وزیراعظم کا بیجنگ میں آنڑن ہسپتال کا دورہ، جدید ٹیکنالوجی اور بہترین خدمات کی فراہمی کو سراہا

بدھ 3 ستمبر 2025 17:13

بیجنگ(اُردو پوائنٹ اخبارتازہ ترین - این این آئی۔ 03 ستمبر2025ء)وزیراعظم محمد شہباز شریف نے بیجنگ میں آنڑن ہسپتال کا دورہ کیا اور ہسپتال میں موثر نظام ، جدید ٹیکنالوجی اور بہترین خدمات کی فراہمی کو سراہا۔ بدھ کو وزیراعظم آفس کے میڈیا ونگ کی طرف سے جاری بیان کے مطابق اس موقع پر نائب وزیراعظم و وزیر خارجہ محمد اسحاق ڈار، وزیر داخلہ محسن نقوی ،وفاقی وزیر منصوبہ بندی و ترقی احسن اقبال، وزیر خزانہ محمد اورنگزیب، وفاقی وزیر اطلاعات و نشریات عطا اللہ تارڑ اور اعلیٰ افسران وزیراعظم کے ہمراہ تھے۔

ہسپتال کے دورے کے دوران وزیراعظم کوہسپتال میں دستیاب سہولیات کے بارے میں بریفنگ دی گئی۔وزیراعظم نے ہسپتال میں دستیاب سہولیات کا معائنہ کیا اور ہسپتال میں مؤثر نظام، جدید ٹیکنالوجی اور بہترین خدمات کی فراہمی پر ہسپتال انتظامیہ کی تعریف کی۔

(جاری ہے)

وزیراعظم نے وزیر داخلہ محسن نقوی کو اسلام آباد میں زیر تعمیر منصوبوں اور وزارت صحت کو اسلام آباد میں زیر تعمیر جناح میڈیکل کمپلیکس اور دیگر ہسپتالوں میں آنڑن ہسپتال کی طرز پر سادہ، مضبوط اور پائیدار انفراسٹرکچر قائم کرنے کی ہدایت کرتے ہوئے کہا کہ پاکستان میں زیر تعمیر ہسپتالوں میں چین کی طرز پر معیاری سہولیات کی فراہمی کو ترجیح دی جائے۔

دورے کے دوران وزیراعظم کو ہسپتال میں دستیاب صحت کی سہولیات اور ہسپتال کے مؤثر انتظام کے لیے موجود روبوٹس اور دیگر جدید ٹیکنالوجی کی سہولیات کا معائنہ کرایا گیا۔