وزیرِ اعظم اور صدر کی کوئٹہ میں بی این پی کے جلسے میں دھماکے کی مذمت

بدھ 3 ستمبر 2025 17:16

بیجنگ/اسلام آباد(اُردو پوائنٹ اخبارتازہ ترین - این این آئی۔ 03 ستمبر2025ء) صدر مملکت آصف علی زر داری اوروزیر اعظم محمد شہباز شریف نے کوئٹہ میں بلوچستان نیشنل پارٹی کے جلسے میں دھماکے کی شدید الفاظ میں مذمت کرتے ہوئے کہا ہے کہ سیاسی جلسے پر حملہ بلوچستان میں دہشتگردوں کی انتشار پھیلانے کی گھناؤنی سازش کا منہ بولتا ثبوت ہے۔ بدھ کواس واقعہ پر اپنے ردعمل میں وزیرِ اعظم نے دھماکے میں قیمتی جانوں کے ضیاع پر دکھ اور افسوس کا اظہار کیا اور واقعہ میں زخمی ہونے والوں کی جلد صحتیابی کیلئے دعا کی ، وزیرِ اعظم نے زخمیوں کو بہترین طبی سہولیات فراہم کرنے کی ہدایت کی۔

وزیر اعظم نے دھماکے میں ملوث افراد کی جلد نشاندہی کرکے انہیں قرار واقعی سزا دلوانے کی ہدایت بھی کی۔

(جاری ہے)

انہوں نے کہا کہ سیاسی جلسے پر حملہ بلوچستان میں دہشتگردوں کی انتشار پھیلانے کی گھناؤنی سازش کا منہ بولتا ثبوت ہے، دہشتگرد بلوچستان کے امن اور ترقی کے دشمن ہیں۔ انہوں نے دہشتگردی کے عفریت کے مکمل خاتمے تک اس کے خلاف جنگ جاری رکھنے کے عزم کا اظہار کرتے ہوئے کہا کہ معصوم و نہتے شہریوں پر دہشتگرد حملے بزدلانہ فعل اور قابل مذمت ہیں۔

اپنے بیان میں صدرِ مملکت آصف علی زرداری نے کوئٹہ میں شاہوانی سٹیڈیم کے قریب دھماکے کی شدید مذمت کرتے ہوئے واقعہ کی تحقیقات کی ہدایت کی ہے۔ صدر مملکت نے دھماکے میں جاں بحق افراد کے اہلِ خانہ سے تعزیت اور دلی ہمدردی کا اظہار کیا ہے۔ صدر مملکت نے زخمیوں کی جلد صحت یابی کے لیے دعا کی اور متعلقہ حکام کو علاج معالجے کی بہترین سہولیات فراہم کرنے کی ہدایت بھی کی۔ انہوں نے متعلقہ اداروں سے واقعے کی مکمل تحقیقات اور ملوث عناصر کو قانون کے کٹہرے میں لانے کا بھی حکم دیا۔