کمسن اور نوجوان شیشہ، حقہ اور آئس نشے کی لعنت میں مبتلا، والدین شدید پریشان

بدھ 3 ستمبر 2025 17:08

جیکب آباد (اُردو پوائنٹ اخبارتازہ ترین - این این آئی۔ 03 ستمبر2025ء) کمسن اور نوجوان شیشہ، حقہ اور آئس نشے کی لعنت میں مبتلا، والدین شدید پریشان۔

(جاری ہے)

تفصیلات کے مطابق مہران سوشل فورم کے چیئرمین ایڈووکیٹ عبدالحئی سومرو، وائس چیئرمین نظیر احمد جمالی، صدر زاہد علی وگھن، کوآرڈینیٹر میر حسن کریم گولو، جنرل سیکریٹری راجہ انڑ، انفارمیشن سیکریٹری فہیم رسول سومرو، ڈیجیٹل میڈیا کوآرڈینیٹر آغا محمد سراج واگھو، آڈیٹر نثار احمد سومرو، خزانچی محمد مزمل داؤدپوٹو، آفیس سیکریٹری محمد آصف منجھو اور دیگر نے جیکب آباد اور گردونواح میں نوجوانوں اور کمسن بچوں میں بڑھتے ہوئے شیشہ، حقہ اور آئیس کے نشے کے رجحان پر شدید تشویش کا اظہار کرتے ہوئے ایس ایس پی محمد کلیم ملک سے فوری نوٹس لینے کا مطالبہ کیا ہے فورم کے رہنماؤں کا کہنا ہے کہ اس خطرناک نشے کی وجہ سے نوجوان مختلف سماجی برائیوں کا شکار ہو رہے ہیں جبکہ والدین اور سول سوسائٹی سخت پریشانی میں مبتلا ہے، انہوں نے کہا کہ پولیس اور متعلقہ ادارے اس سنگین مسئلے کے تدارک میں اپنا کردار ادا کرنے میں ناکام دکھائی دیتے ہیں جس کی وجہ سے معصوم بچوں کا مستقبل تباہی کے دہانے پر پہنچ رہا ہے، انہوں نے کہا کہ نشے کی لعنت نہ صرف معاشرتی زوال کا باعث ہے بلکہ یہ ہماری نئی نسل کے مستقبل کو بھی داؤ پر لگا رہی ہے اس لیے اس مسئلے کا سدباب نہایت ضروری ہے، مہران سوشل فورم کے عہدیداران نے امید ظاہر کی ہے کہ ایس ایس پی جیکب آباد اس معاملے پر فوری ایکشن لیتے ہوئے ضلع کو شیشہ، حقہ اور آئیس جیسے موذی نشوں سے پاک کرنے میں اپنا کردار ادا کریں گے تاکہ والدین سکون کا سانس لے سکیں۔