Live Updates

صدرالخدمت فانڈیشن کا دریائے ستلج کی طغیانی سے متاثرہ پانچ دیہاتوں کا دورہ

بدھ 3 ستمبر 2025 18:26

لاہور(اُردو پوائنٹ اخبارتازہ ترین - این این آئی۔ 03 ستمبر2025ء)صدر الخدمت فانڈیشن پاکستان پروفیسر ڈاکٹر حفیظ الرحمن نے دریائے ستلج کی طغیانی سے متاثرہ گنڈا سنگھ والا سمیت پانچ دیہاتوں کا دورہ کیا اور مزید 100 متاثرہ خاندانوں کو فوڈ پیکج، صاف پانی فراہم کیا ۔ اس موقع پر ریجنل صدراکرام الحق سبحانی، سی ای او الخدمت خبیب بلال، سینئر منیجر میڈیا ریلیشنز شعیب ہاشمی بھی موجود تھے۔

ڈاکٹر حفیظ الرحمن گنڈا سنگھ والا تلوار چوک کے مقام پر قائم الخدمت آپریشنل کیمپ میں پہنچے تو اکرام الحق سبحانی نے انہیں امدادی سرگرمیوں کے بارے میں بریفنگ دیتے ہوئے بتایا کہ اس کیمپ کے ذریعے سیلاب سے متاثرہ دیہاتوں میں پھنسے افراد کو چار کشتیوں کے ذریعے ریسکیو کرکے محفوظ مقامات پر پہنچایا جارہا ہے ۔

(جاری ہے)

الخدمت کے رضاکاروں کے پاس لائف جیکٹس سمیت سیفٹی سے متعلق تمام امدادی سامان موجود ہے۔

ان کشتیوں کے ذریعے سیلابی پانی کے دوسری جانب دیہاتوں میں موجود خاندانوں کو الخدمت موبائل کچن کے ذریعے تیار کھانا، صاف پانی، جانوروں کا چارہ اور دیگر امدادی سامان بھی فراہم کیا جارہا ہے۔ زخمیوں اور میڈیکل کی دیگر ضروریات کے لیے الخدمت موبائل ہیلتھ یونٹ مسلسل متاثرین کی خدمت جاری رکھے ہوئے ہے جہاں میل اور فی میل ڈاکٹرز موجود ہیں۔

2100 سے زائد مریضوں کو اب تک میڈیکل ریلیف فراہم کیا جا چکا ہے۔انہوں نے بتایا کہ 15 دن سے جاری امدادی سرگرمیوں کے دوران سینکڑوں افراد کو ریسکیو کیا جا چکا ہے۔ سیلاب کی وجہ سے ان دیہاتوں کی چاول اور تل کی فصلیں تباہ ہو چکی ہیں، گھر پانی میں ڈوبے ہیں، جانور پانی میں بہہ چکے ہیں۔ ایسی صورتحال میں الخدمت مسلسل ریلیف سرگرمیاں جاری رکھے ہوئے ہے اور جانوروں کے لیے ویٹرنری کیمپ بھی قائم کیا گیا ہے۔

الخدمت موبائل واٹر فلٹریشن پلانٹ کے ذریعے متاثرہ علاقوں کو صاف پانی کی فراہمی بھی جاری ہے۔ ڈاکٹر حفیظ الرحمن نے جاری امدادی سرگرمیوں پر اطمینان کا اظہار کیا، ذمہ داران اور رضاکاروں کی خدمات کو سراہتے ہوئے انھیں خراجِ تحسین پیش کیا۔ انہوں نے کہا کہ الخدمت متاثرین کے ریلیف کے لیے تمام دستیاب وسائل کو استعمال میں لائے گی۔