اسلام آباد کی وژن پاکستان عمارت نے آغا خان آرکیٹیکچر ایوارڈ 2025 جیت لیا

جمعرات 4 ستمبر 2025 13:54

اسلام آباد (اُردو پوائنٹ اخبارتازہ ترین - اے پی پی۔ 04 ستمبر2025ء) پاکستان کے دارالحکومت اسلام آباد میں واقع ’’ویژن پاکستان‘‘ عمارت نے عالمی شہرت یافتہ آغا خان آرکیٹیکچر ایوارڈ 2025 جیت لیا، یہ عمارت 16ویں ایوارڈ سائیکل کے تحت 7 ممالک کے پراجیکٹس کے ساتھ فاتح قرار پائی جن میں بنگلہ دیش، چین، مصر، ایران اور فلسطین بھی شامل ہیں۔تفصیلات کے مطابق وژن پاکستان کو’’ڈی بی سٹوڈیز‘‘کے زیرِ انتظام معروف پاکستانی آرکیٹیکٹ سیف اللہ صدیقی نے جدید اور پاکستانی و عرب فنِ تعمیر سے متاثرہ انداز میں ڈیزائن کیا۔

یہ عمارت ایک خیراتی ادارے کا مرکز ہے جو پسماندہ نوجوانوں کو پیشہ ورانہ تربیت فراہم کرتا ہے۔ سیف اللہ صدیقی نے کہا کہ یہ عمارت ایک ووکیشنل ٹریننگ انسٹی ٹیوٹ ہےجس کا مقصد کم وسائل والے بچوں کو خود مختاری سیکھنے کا ماحول فراہم کرنا ہے۔

(جاری ہے)

انہوں نے کہا کہ ہم اپنے ہر پراجیکٹ میں موسمیاتی تبدیلی کو مدنظر رکھتے ہیں۔وژن پاکستان کی کلائنٹ رشدا طارق قریشی نے کہا کہ یہ عمارت صرف جمالیاتی طور پر خوبصورت نہیں بلکہ ایک ایسی جگہ ہے جو زندگیوں کو بدلنے کی طاقت رکھتی ہے، کوئی بھی نوجوان جو کبھی منظم کلاس روم یا روشن مستقبل کا حصہ نہیں رہا یہاں آکر مکمل طور پر بدل جاتا ہے۔

واضح رہے کہ یہ ایوارڈ وژن پاکستان کی سماجی و ماحولیاتی اہمیت کو اجاگر کرتا ہےجو نہ صرف فنِ تعمیر بلکہ سماجی بہبود کے لیے بھی ایک مثال ہے۔\932