ایف آئی اے لاہور زون کی کارروائیاں، حوالہ ہنڈی اور کاپی رائٹ ایکٹ کی خلاف ورزی میں ملوث اشتہاری سمیت 3 ملزمان گرفتار

جمعرات 4 ستمبر 2025 16:25

لاہور (اُردو پوائنٹ اخبارتازہ ترین - اے پی پی۔ 04 ستمبر2025ء) ایف آئی اے لاہور زون نے کارروائیاں کرکے حوالہ ہنڈی اور کاپی رائٹ ایکٹ کی خلاف ورزی میں ملوث اشتہاری سمیت 3 ملزمان کو گرفتار کر لیا۔ترجمان کے مطابق کارپوریٹ کرائم سرکل لاہور نے حوالہ ہنڈی اور کاپی رائٹ ایکٹ کی خلاف ورزی میں ملوث اشتہاری سمیت 3 ملزمان گرفتار کر لئے ۔گرفتار ملزم کی شناخت محمد اسلم، محمد بلال سرور اور محمد عثمان غنی کے نام سے ہوئی ہے۔

(جاری ہے)

ملزم محمد اسلم نے درخواست گزار سے1 لاکھ 54 ہزار سعودی ریال ہتھیا کر حوالہ ہنڈی کے ذریعے پاکستان بھیجے۔ملزم فراڈ اور حوالہ ہنڈی میں ملوث پایا گیا۔ملزم کافی عرصہ سے ایف آئی اے کو مطلوب تھا۔ملزم کو چھاپہ مار کارروائی میں ضلع وہاڑی سے گرفتار کیا گیا جبکہ ملزمان محمد بلال سرور اور محمد عثمان غنی سے بھاری تعداد میں معروف رجسٹرڈ کمپنی کی جعلی پراڈکٹس برآمد ہوئی۔ملزمان رجسٹرڈ کمپنی کی جعلی پراڈکٹس کا سٹاک رکھنے اور فروخت کرنے میں ملوث پائے گئے۔ملزمان کو چھاپہ مار کارروائی میں لاہور سے گرفتار کر کے مزید تفتیش کا آغاز کر دیا گیا ہے۔