انسانی اسمگلنگ کی روک تھام کے لئی6 ممالک میں ایف آئی اے کے لنک دفاتر کھولنے کا فیصلہ

ایف آئی اے امیگریشن ونگ کے لنک دفاتر برطانیہ، اسپین ،اٹلی ،ملائیشیاء، یو اے ای میں کھولیں جائینگے‘ ذرائع

جمعرات 4 ستمبر 2025 19:07

لاہور(اُردو پوائنٹ اخبارتازہ ترین - این این آئی۔ 04 ستمبر2025ء)انسانی اسمگلنگ کے بڑھتے ہوئے واقعات کی روک تھام کے اقدامات کے تحت مزید 6 ممالک میں وفاقی تحقیقاتی ادارے کے امیگریشن ونگ کے لنک دفاتر کھولنے کا فیصلہ کیا گیا ہے ۔نجی ٹی وی نے ذرائع کے حوالے سے بتایا کہ ایف آئی اے امیگریشن ونگ کے لنک دفاتر برطانیہ، اسپین اور اٹلی میں قائم کیے جائیں گے جبکہ ترکیہ، ملائیشیا ء اور متحدہ عرب امارات میں بھی ایک ایک دفتر کھولاجائے گا۔

(جاری ہے)

وفاقی تحقیقاتی ایجنسی کے ذرائع کے مطابق پاکستان میں انسانی اسمگلنگ نیٹ ورک ان ممالک سے چلائے جاتے ہیں، دفاتر قائم کرنے کا فیصلہ ان ممالک میں انسانی اسمگلروں کے مضبوط نیٹ ورک کی وجہ سے کیا گیا۔ذرائع کا کہنا ہے کہ انسانی اسمگلنگ کے حالیہ واقعات کی تفتیش میں بین الاقوامی نیٹ ورکس کا انکشاف ہوا تھا۔ذرائع ایف آئی اے کے مطابق سی پیک فیز ٹو کے دوران غیرملکی تاجروں اور سیاحوں کی آمد میں اضافہ متوقع ہے، ایف آئی اے لنک دفاتر غیرملکی تاجروں اور سیاحوں کو بھی سہولت فراہم کریں گے۔ایف آئی اے کا کہنا ہے کہ غیرقانونی نقل مکانی روکنے اور مسافروں کی بہتر خدمت کے لیے دفاتر قائم کیے جائیں گے۔