آزادکشمیر میں گورننس کے نظام کو تبدیل کر دیا ہے ،سب آئین و قانون کے مطابق کام کر رہے ہیں ،وزیراعظم آزادجموں وکشمیر چوہدری انوارالحق

مظفر آباد (اُردو پوائنٹ اخبارتازہ ترین - اے پی پی۔ 04 ستمبر2025ء) وزیراعظم آزادجموں وکشمیر چوہدری انوارالحق نےکہا ہے کہ آزادکشمیر میں گورننس کے نظام کو تبدیل کر دیا گیا ہے اور جواب دہی کا ایسا نظام متعارف کرایا ہے جس میں سب آئین و قانون کے مطابق کام کر رہے ہیں ،سرکاری دفاتر میں بائیو میٹرک کے نفاذ سے ملازمین کی حاضری کو یقینی بنایا جا رہا ہے جس سے عوام کو سہولت حاصل ہو رہی ہے ،شفاف پبلک سروس کمیشن کے ذریعے آزادکشمیر کے نوجوانوں میں میرٹ اور شفافیت کے کلچر کو فروغ دیا ہے ، یہاں وفود سے گفتگو کرتے ہوئے انہوں نے کہا کہ احتساب کا عمل خود اپنی ذات سے شروع کیا تاکہ کسی کو انگلی اٹھانے کا موقع نہ ملے ۔

اللّہ تعالیٰ کے فضل و کرم سے دو سال چار ماہ میں اربوں روپے خرچ کیے مجھ پر یا میری کابینہ کے کسی رکن پر ایک روپے کی کرپشن کا کوئی الزام نہیں ہے جو راہ راست سے ہٹا یا کسی کے خلاف شکایت آئی تو قانون نے اپنا کام خود کیا ،اداروں میں شفافیت کو یقینی بنایا، عہدوں پر تقرریاں میرٹ پر کیں ،سی بی آر اپنے اہداف سے زیادہ ٹیکس وصول کر رہا ہے جو آزادکشمیر کے عوام کا اپنی حکومت پر اعتماد کا مظہر ہے ۔

(جاری ہے)

3000 کلومیٹر سڑکوں کی تعمیر کو یقینی بنایا گیا ،ای ٹینڈرنگ کے ذریعے عوام کے ٹیکس کے پیسے کی اربوں روپے کی بچت کی ۔عوام کیلیے جو میرے بس میں تھا کیا ،اپنے حلقہ انتخاب کو وقت نہیں دے سکا لوگوں کے گلے بھی جائز ہیں مگر پورا آزادکشمیر میرا حلقہ ہے ،حال ہی میں پونچھ کے دورے پر گیا تو ان کے دیرینہ مسائل کو حل کیا اور انہیں بتایا کہ اپنے سابق نمائندوں سے پوچھیں کہ سالہا سال اقتدار میں رہنے کے باوجود وہ عوام کیلیے کیوں کچھ نہ کر سکے ،سوال پوچھنا چاہیے اس سے کارکردگی کا پتہ چلتا ہے اور عوامی نمائندوں میں بھی جواب دہی کا احساس پیدا ہوتا ہے ۔

انہوں نے دوٹوک لفظوں میں کہا کہ میرے دو سال چار ماہ کا تقابل پچھلے ستر سال سے کر لیجیے آپ کا سر فخر سے بلند ہو جائے گا کہ اب آپ کے نمائندے نے آپ لوگوں کا سر جھکنے نہیں دیا ہے ۔ اللّہ تعالیٰ کا مجھ پر خاص کرم اور میری مرشد خانہ میری والدہ محترمہ کی دعائیں ہیں کہ اللّہ پاک نے مجھے مخلوق خدا کی خدمت کا موقع دیا ہے رب سے صرف چھ ماہ مانگے تھے اب دو سال سے اوپر ہو گئے ہیں آزادکشمیر کے لوگوں کو یہ تو بتا دیا کہ حکومت ایسے بھی کی جا سکتی ہے شرط یہ ہے کہ آپ کے دل میں عوام کی خدمت اور محبت رچی بسی ہو ۔وفود نے وزیراعظم آزاد کشمیر کے عوامی خدمت کے جذ بہ کو سراہا ۔