وزیراعلیٰ نے سیلاب متاثرین کی جلد بحالی کیلئے جامع پیکیج طلب کرلیا

لاہور(اُردو پوائنٹ اخبارتازہ ترین - این این آئی۔ 05 ستمبر2025ء)وزیراعلیٰ پنجاب مریم نواز شریف کی زیرصدارت طویل ترین خصوصی اجلاس منعقد ہوا۔اجلاس میں میں سیلاب متاثرین کی بحالی کے لئے جامع پیکج طلب کر لیا۔ وزیراعلیٰ مریم نواز شریف نے اربن یونٹ، بورڈ آف ریونیواور دیگر ڈیپارٹمنٹس کو بحالی پیکج کے لئے فوری اقدامات کی ہدایت کی اور متاثرین کے مسائل پر ہمدردانہ غور کرنے کا حکم دیا۔

وزیراعلیٰ مریم نواز شریف نے سروے پراجیکٹ کے لئے اعلیٰ سطح کمیٹی قائم کر دی۔ وزیراعلیٰ مریم نواز شریف نے سیلاب متاثرہ کاشتکاروں کے لئے بحالی پروگرام وضح کرنے کا حکم دیا اور بحالی پیکج میں امدادی رقوم بڑھانے کی ہدایت کی۔ وزیراعلیٰ مریم نواز شریف نے بحالی پیکج کے لئے سروے جلد از جلد مکمل کرنے کی ہدایت کی۔

(جاری ہے)

سروے کے لئے شفاف ترین طریقہ کار وضع کرنا ہوگا اورڈیجیٹل ریکارڈنگ بھی ہوگی۔

وزیراعلیٰ مریم نواز شریف سیلاب متاثرین کی جلد بحالی پیکج کا خود علان کریں گی۔ وزیراعلیٰ مریم نواز شریف نے گھر تباہ ہونے کی وجہ سے فوری واپس نہ جانے والے خاندانوں کے لئے ہر ضلع میں مارکی لگانے کی ہدایت کی۔ سردی کی آمد کے پیش نظر سیلاب متاثرہ خاندانوں کو ہر ضلع میں مارکی میں شفٹ کیا جائے گا۔ وزیراعلیٰ مریم نواز شریف نے مرد و خواتین کے لئے الگ الگ مارکی لگانے اور صاف پانی، کھانا اور دیگر سہولتیں مہیا کرنے کا حکم دیا۔

اجلاس میں آبی گزر گاہوں سے تجاوزات اور آبادیاں ختم کرنے کا فیصلہ کیا گیا۔ اس موقع پر دریاؤں اور ندی نالوں کی آبی گزرگاہوں کو تعمیرات کے لئے ریڈ زون قرار دینے پر اتفاق کیا گیا۔ اجلاس میں سیلاب متاثرین کے گھروں کی بحالی کے لئے اپنی چھت، اپنا گھر پروگرام میں شامل کرنے کابھی فیصلہ کیا گیا۔ وزیراعلیٰ مریم نواز شریف نے کہا کہ سیلاب متاثرین کے گھر آباد ہونے تک چین سے نہیں بیٹھ سکتی۔

سیلاب زدہ علاقوں میں جاتی ہو ں تووہاں لوگوں کی پریشانی نہیں دیکھی جاتی۔ لوگوں کے گھر اجڑ گئے، ہم سکون سے کیسے بیٹھ سکتے ہیں۔ وزیراعلیٰ مریم نواز شریف نے کہا کہ سیلاب متاثرین کی بہت سے توقعات مجھ سے وابستہ ہیں، ان توقعات پر پورا اترنا میرا اعزاز اور ذمہ داری ہے۔ پنجاب میں فلڈ اور دیگر آفات سے بچاؤ کے لیے ماسٹر پلان کی اشد ضرورت ہے۔ وزیراعلیٰ مریم نواز شریف نے کہا کہ ہر سال سیلاب کی وجہ سے نقصان ہوتا ہے، طویل المدتی اور قلیل المدتی پائیدارپالیسیاں بنانے کی ضرورت ہے۔