ا* وزارت آئی ٹی کا نیشنل سپر ایپ اور ویب پورٹل لانچ کرنے کا فیصلہ

گ* شہری اور کاروباری حضرات کے لیے سرکاری خدمات ایک ہی پلیٹ فارم پر دستیاب ہوں گی ٹ* سپر ایپ سے ڈیجیٹل پاکستان میں شفافیت اور کارکردگی میں اضافہ متوقع

جمعہ 5 ستمبر 2025 19:50

اسلام آباد(اُردو پوائنٹ اخبارتازہ ترین - آن لائن۔ 05 ستمبر2025ء) وزارت انفارمیشن ٹیکنالوجی نے ڈیجیٹل پاکستان کے تحت نیشنل سپر ایپ اور ویب پورٹل لانچ کرنے کا فیصلہ کیا ہے، جس کے ذریعے شہری اور کاروباری حضرات سرکاری خدمات تک ایک ہی جگہ پر رسائی حاصل کر سکیں گے۔یہ منصوبہ ورلڈ بینک کی معاونت سے ڈیجیٹل اکانومی انہانسمنٹ پراجیکٹ کے تحت شروع کیا گیا ہے۔

نیشنل سپر ایپ اور ویب پورٹل نادرا کے نیشنل ڈیجیٹل آئی ڈی سسٹم سے منسلک ہوگی اور وفاقی و صوبائی سطح پر مختلف محکموں کو یکجا کرے گی۔اس کے ذریعے لائسنس کی تجدید، ٹیکس جمع کرانے، پرمٹ حاصل کرنے، کمپنیوں کے لائسنس، این او سی اور دیگر سرکاری فیسوں کی ادائیگی آن لائن ممکن ہوگی۔ شہری موبائل یا ویب کے ذریعے 24/7 خدمات سے مستفید ہو سکیں گے۔

(جاری ہے)

سپر ایپ سے سرکاری اداروں کی شفافیت اور کارکردگی میں بہتری آئے گی، ورک فلو ڈیجیٹلائز اور خودکار نظام کے ذریعے وقت اور اخراجات میں کمی ہوگی، جبکہ شہری اور کاروبار فیس اور ٹیکس کی ادائیگی آسانی سے کر سکیں گے۔یہ منصوبہ پاکستان ڈیجیٹل گورنمنٹ انٹرپرائز آرکیٹیکچر کے تحت تیار کیا جا رہا ہے۔ سپر ایپ میں زیرو ٹرسٹ ماڈل اور اینڈ ٹو اینڈ انکرپشن شامل ہوگی، اور بائیو میٹرک تصدیق کے ذریعے محفوظ رسائی فراہم کی جائے گی۔ مستقبل میں اس میں سبسکرپشن، پریمیئم ماڈل اور ان ایپ ایڈورٹائزنگ کی سہولت بھی شامل کی جا سکتی ہے۔وزارت آئی ٹی سپر ایپ کی ڈیزائننگ کے لیے کنسلٹنسی فرم ہائر کر رہی ہے، اور توقع ہے کہ یہ پلیٹ فارم حکومت اور عوام کے تعلقات میں نئی جہت لے آئے گا۔