نظریہ پاکستان میں عید میلاد النبی ؐ کے موقع پر سیمینار کا انعقاد

ہفتہ 6 ستمبر 2025 21:20

اسلام آباد (اُردو پوائنٹ اخبارتازہ ترین - اے پی پی۔ 06 ستمبر2025ء) نظریہ پاکستان کونسل کے زیراہتمام عید میلاد النبی صلی اللہ علیہ وسلم کی مناسبت سے سیمینار کا انعقاد کیا ہے۔اسلامی نظریاتی کونسل کے سیکرٹری اور معروف سکالر ڈاکٹر حافظ اکرام الحق نے اپنے خطاب میں کہا کہ حضور نبی اکرم صلی اللہ علیہ وآلہ وسلم تمام جہانوں کے لیے رحمت بنا کر بھیجے گئے،ان کی رحمت ہر چیز پر محیط ہے،انہوں نے اس بات پر زور دیا کہ رسول اللہ صلی اللہ علیہ وسلم اعلیٰ ترین اخلاق کے مالک تھے اور کوئی بھی ان کے قد کے برابر نہیں ہو سکتا۔

انہوں نے مزید وضاحت کی کہ پیغمبر اسلام ؐکی زندگی کے دو اہم دور تھے، مکی اور مدنی ادوار،غیر مسلموں نے بھی نبی کریم صلی اللہ علیہ وسلم کے مثالی کردار کی تعریف کی۔

(جاری ہے)

مہمان خصوصی معروف مصنفہ اور سکالر محمودہ غازیہ نے کہا کہ حضور نبی اکرم صلی اللہ علیہ وآلہ وسلم کی پوری زندگی بے لوثی، ایثار، عفو و درگزر اور بے مثال محبت سے منور ہے۔ نبی صلی اللہ علیہ وسلم نے کبھی اپنے لیے کچھ نہیں چاہا بلکہ ہمیشہ دوسروں کے لیے قربانی دی ا اور اپنی امت کے ساتھ بے پناہ شفقت کا مظاہرہ کیا۔

انہوں نے نبی پاک ؐ کی سیرت کو سب کے لیے ایک بہترین رہنما قرار دیا۔نظریہ پاکستان کونسل کی ایگزیکٹو کونسل کے سینئر ممبر اور روحانیت پر متعدد انگریزی کتابوں کے مصنف میجر جنرل (ر) محمد طاہر نے کہا کہ نبی کریم صلی اللہ علیہ وسلم کی زندگی کا ہر پہلو انسانیت کے لیے باعث رحمت ہے ۔مشہور شاعر اور ماہر تعلیم پروفیسر سبین یونس نے کہا کہ حضور صلی اللہ علیہ وسلم کی صفات ایک نہ ختم ہونے والے سمندر کی طرح وسیع ہیں ۔

شاعرہ اور دانشور نصرت یاب نصرت نے اس بابرکت محفل کے انعقاد پر نظریہ پاکستان کونسل کے چیئرمین اور پوری ٹیم کو مبارکباد دی۔ انہوں نے کہا کہ حضور نبی اکرم صلی اللہ علیہ وآلہ وسلم کی قربانیاں ہمیں نہ صرف آپ ؐکی سنت پر عمل کرنے بلکہ ان کی تعلیمات کو آنے والی نسلوں تک پہنچانے کی یاد دلاتی ہیں۔معروف افسانہ نگار اور شاعرہ فرخندہ شمیم نے حضور نبی اکرم صلی اللہ علیہ وآلہ وسلم کی شان میں دلکش نعتیں پیش کیں اور حاضرین سے خوب داد وصول کی۔اس موقع پر دیگر سکالرز اور دانشوروں میں سید ظہیر گیلانی، رفعت انجم اور نعیم خالد شامل تھے۔