سعودی عرب کے طلبا کو گوگل کے "اے آئی ٹولز"کی ایک سال مفت سبسکرپشن کی پیشکش

پیر 8 ستمبر 2025 08:50

ریاض (اُردو پوائنٹ اخبارتازہ ترین - اے پی پی۔ 08 ستمبر2025ء) عالمی ٹیک کمپنی گوگل نےاعلان کیا کہ وہ سعودی عرب میں یونیورسٹی کے طلبا کو اپنے جنریٹو اے آئی ٹول، جیمنی کے پرو ورژن کے ایک سال کی مفت سبسکرپشن کی پیشکش کر رہی ہے۔ عرب نیوز کے مطابق اس سبسکرپشن کی مالیت 860ریال (229 ڈالر) ہے، اور طلبا کو انٹرایکٹو آڈیو اور ویڈیو سیکھنے کے ٹولز اور جدید تحقیقی خصوصیات تک رسائی فراہم کرتی ہے جو اسائنمنٹ بنانے اور امتحان کی تیاری کے لیے استعمال کی جا سکتی ہیں۔

(جاری ہے)

ویو تھری کا جیمنی پرو ورژن صارفین کو متن یا تصاویر کو آٹھ سیکنڈ کی ویڈیوز میں تبدیل کرنے کی سہولت فراہم کرتا ہے۔ یہ نوٹ بک ایل ایم سے بھی مربوط کرتا ہے جو پیچیدہ تحقیقی مواد، ویڈیوز اور دستاویزات کو آڈیو مواد میں تبدیل کرنے کے قابل بناتا ہے۔گوگل نے کہا کہ جیمنی ایپ طالب علموں کو کسی خاص موضوع پر معلومات کا خلاصہ تیار کرنے، انٹرایکٹو کوئز بنانے یا ایک لیکچر کے نوٹس کا خلاصہ پیش کرنے والی مختصر پوڈ کاسٹ سننے میں مدد کرتی ہے۔یہ پیشکش سعودی عرب میں 18 سال اور اس سے زیادہ عمر کے تمام یونیورسٹی طلبا کے لیے دستیاب ہے۔ یہ 3 نومبر تک دستیاب ہے اور مفت سبسکرپشن رجسٹریشن کی تاریخ سے شروع ہوگی۔