’’آپریشن دوارکا‘‘ بحری تاریخ کا درخشندہ باب ہے‘ محسن نقوی

آج کے دن پاک بحریہ نے سمندری سرحدوں کا دفاع کر کے تاریخ رقم کی‘یوم بحریہ پر جانبازوں کو سلام

پیر 8 ستمبر 2025 13:15

’’آپریشن دوارکا‘‘ بحری تاریخ کا درخشندہ باب ہے‘ محسن نقوی

اسلام آباد(اُردو پوائنٹ اخبارتازہ ترین - این این آئی۔ 08 ستمبر2025ء) وفاقی وزیر داخلہ محسن نقوی نے کہا ہے کہ جنگ ستمبر میں ’’آپریشن دوارکا‘‘ بحری تاریخ کا درخشندہ باب ہے، آج کے دن پاک بحریہ نے سمندری سرحدوں کا دفاع کر کے تاریخ رقم کی۔یوم بحریہ پر جانبازوں کو سلام پیش کرتے ہوئے وزیر داخلہ محسن نقوی کا کہنا تھا کہ 8 ستمبر پاک بحریہ کے بہادر سپوتوں کے عظیم قربانیوں اور بے مثال کارناموں کو خراج تحسین پیش کرنے کا دن ہے، آج کے دن پاک بحریہ نے سمندری سرحدوں کا دفاع کر کے تاریخ رقم کی، بحری محاذ پر جرا?ت و قربانی کا نیا باب رقم کرنے والے جانباز قوم کے ہیرو ہیں۔

انہوں نے کہا کہ یہ دن بہادری، پیشہ ورانہ مہارت اور فرض شناسی کی تابندہ علامت ہے، 1965 کی جنگ میں پاک بحریہ نے دشمن کے غرور کو پانی میں غرق کر کے سمندری محاذ پر بھی برتری ثابت کی۔

(جاری ہے)

ان کا کہنا تھا کہ جنگ ستمبر میں ’’آپریشن دوارکا‘‘ بحری تاریخ کا درخشندہ باب ہے، پاک بحریہ کے جانبازوں نے چند لمحوں میں دشمن کی اہم ساحلی تنصیبات کو تباہ کر کے سمندری جنگ کا نقشہ بدل دیا اور کراچی پر حملے کا منصوبہ خاک میں ملایا، آپریشن دوارکا کے بعد معرکہ حق میں بھی پاک بحریہ الرٹ رہی اور دشمن کراچی پر حملے کی جرات نہیں کر سکا۔

محسن نقوی نے کہا کہ پاک بحریہ نے اپنی پیشہ ورانہ تیاریوں، تنظیم اور جذبہ سرفروشی سے دشمن کو حیران کر دیا، یومِ بحریہ نہ صرف ایک تاریخی دن ہے، بلکہ ایک تسلسل ہے اُس عہد، اُس جذبے اور اُس یقین کا جو سمندر کی وسعتوں میں پروان چڑھا۔وزیر داخلہ کا کہنا تھا کہ آج پاک بحریہ جدید ٹیکنالوجی، میزائل سسٹمز اور خود انحصاری کے ساتھ ایک مضبوط اور مؤثر بحری قوت کے طور پر سامنے آ چکی ہے، عالمی بحری مشقوں میں شمولیت، علاقائی میری ٹائم سکیورٹی میں قائدانہ کردار اور سفارتی سطح پر سرگرم شراکت پاک بحریہ کی قابل فخر پہچان بن چکی ہے۔

انہوں نے مزید کہا کہ قوم کو سمندری محافظوں پر ناز ہے، جنہوں نے پیشہ ورانہ مہارت اور حکمت عملی سے بحری سرحدوں کو ناقابلِ تسخیر بنا دیا، پاک بحریہ 8 ستمبر 1965 کے جذبے کو زندہ جاوید رکھنے کے لئے پر عزم ہے۔