حالیہ بارشوں اور سیلاب سے متاثرہ علاقوں میں بجلی کی بحالی تیزی سے جاری

اسلام آباد (اُردو پوائنٹ اخبارتازہ ترین - اے پی پی۔ 08 ستمبر2025ء) حالیہ بارشوں اور سیلاب سے متاثرہ علاقوں میں بجلی کی بحالی تیزی سے جاری ہے، اب تک مجموعی طور پر 50 گرڈ اور 515 متاثرہ فیڈرز میں سے 269 کو مکمل اور 242 کو عارضی طور پر بحال کر کے16لاکھ 59 ہزار 7 سو 16 متاثرہ صارفین میں سے 14لاکھ 44 ہزار 86 صارفین کےلئے بجلی بحال کر دی گئی ہے، باقی 2 لاکھ 55 ہزار 2 سو 30 صارفین کےلئے بجلی کی بحالی اولین ترجیح ہے اور اس کے لئے تمام وسائل بروکار لائے جا رہے ہیں۔

سیلاب متاثرہ علاقوں میں بجلی کی بحالی پر پاور ڈویژن کی 8 ستمبر تک کی رپورٹ کے مطابق فیسکو کے زیرِ انتظام علاقوں ٹی ٹی سنگھ، فیصل آباد ، چنیوٹ، جھنگ، سرگودھا، میانوالی اور ڈی آئی خان کے 27 گرڈ اور 80 فیڈرز متاثر ہوئے، متاثرہ فیڈرز میں 17 مکمل اور 59 عارضی طور پر بحال کر کے 201937 متاثرہ صارفین میں سے 90049 صارفین کیلئے بجلی بحال کر دی گئی ہے، باقی 111888 متاثرہ صارفین کیلئے بجلی کی بحالی کا کام پانی اترنے پر 10 ستمبر تک مکمل کرنے کی توقع ہے۔

(جاری ہے)

گیپکوکے کے 11 گرڈز اور 103 متاثرہ فیڈرز میں سے 89 فیڈرز مکمل اور 14 جزوی طور پر بحال کر کے 735987 متاثرہ صارفین میں سے 722402 صارفین کیلئے بجلی بحال کر دی گئی ہے، باقی 13585 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔ لیسکو میں لاہور، اوکاڑہ، شيخوپورہ، قصور اور ننکانہ کے 67 متاثرہ فیڈرز میں سے 57 مکمل اور 10 جزوی طور پر بحال کر کے 73734 متاثرہ صارفین میں سے 64393 صارفین کیلئے بجلی بحال کر دی گئی ہے، باقی 9341 متاثرہ صارفین کیلئے بجلی کی بحالی کا کام 9 سے 10 ستمبر تک مکمل کرنے کی توقع ہے۔

لیسکو کے زیرِ انتظام علاقے شیخوپورہ میں بجلی کی بحالی کا کام مکمل کر لیا گیا ہے۔ میپکو کے زیرِ انتظام علاقوں کے 153 متاثرہ فیڈرز میں سے 4 مکمل اور 149 جزوی طور پر بحال کر دیا گیا ہے۔ میپکو کے زیرِ انتظام علاقوں میں 129244 صارفین متاثر ہوئے، میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔

پیسکو کے علاقے سوات، بنر، شانگلہ، صوابی اور ڈی آئی خان کے 12 گرڈز اور 91 فیڈرز متاثر ہوئے، 86 فیڈرز مکمل اور 5 کو جزوی طور پر بحال کر کے 463375 متاثرہ صارفین میں سے 461049 صارفین کیلئے بجلی بحال کر دی گئی ہے، باقی 2326 متاثرہ صارفین کیلئے بجلی کی بحالی کا کام 11 سے 12 ستمبر تک مکمل کرنے کی توقع ہے۔ پیسکو کے زیرِ انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔

اسی طرح ٹیسکو کے علاقے شمالی وزیرستان اور خیبر کے 18 فیڈرز متاثر ہو ئے، ٹیسکو کے 13 فیڈر مکمل اور 5 فیڈر جزوی طور پر بحال کر کے 31774 متاثرہ صارفین میں سے 27378 صارفین کیلئے بجلی بحال کر دی گئی ہے، باقی 4396 متاثرہ صارفین کیلئے بجلی کی بحالی کا کام تقریباََ 15 ستمبر شام 5 بجے تک مکمل ہونے کی توقع ہےمزید برآں ہیزیکو کے زیرِ انتظام علاقے مانسہرہ کے 3 متاثرہ فیڈر بھی مکمل طور پر بحال کر دئیے گئے ہیں۔