Live Updates

توشہ خانہ ٹو کیس، 14 گواہان کے بیانات ریکارڈ، 3 پر جرح مکمل

پیر 8 ستمبر 2025 16:55

اسلام آباد (اُردو پوائنٹ اخبارتازہ ترین - این این آئی۔ 08 ستمبر2025ء)بانی پی ٹی آئی عمران خان اور بشریٰ بی بی کے خلاف توشہ خانہ ٹو کیس میں مجموعی طور پر 14 گواہان کے بیانات ریکارڈ اور 3 گواہان کے بیانات جرح مکمل کر لی گئی۔اسپیشل جج سینٹرل ایف آئی اے شاہ رخ ارجمند نے اڈیالہ جیل میں کیس کی سماعت کی، بانی پی ٹی آئی اور بشریٰ بی بی کو کمرہ عدالت میں پیش کیا گیا۔

(جاری ہے)

سماعت کے دوران بانی پی ٹی آئی کے سابق پرسنل سیکریٹری انعام شاہ کا بیان قلمبند کر لیا گیا۔3 گواہان کسٹم اپریزر رابعہ صمد، ثناء سعید اور اے ڈی سی عبداللّٰہ خان کے بیانات پر جرح بھی مکمل کر لی گئی، جبکہ استغاثہ کے گواہ عظیم منظور کو غیر ضروری جان کر ترک کر دیا گیا۔سماعت کے دوران بانی پی ٹی آئی کی بہنیں اور بشریٰ بی بی کی بھابھی مہر النساء احمد بھی موجود تھیں۔بعد ازاں اسپیشل جج سینٹرل شاہ رخ ارجمند نے توشہ خانہ ٹو کیس کی سماعت 10 ستمبر تک ملتوی کردی۔