آزاد جموں و کشمیر کی دھرتی نے کئی ایک قابل قدر اور تاریخی شخصیات کو جنم دیا

مظفرآباد(اُردو پوائنٹ اخبارتازہ ترین - این این آئی۔ 08 ستمبر2025ء)آزاد جموں و کشمیر کی دھرتی نے کئی ایک قابل قدر اور تاریخی شخصیات کو جنم دیا جنہوں نے نہ صرف آزاد جموں و کشمیر میں بلکہ دنیا بھر میں اپنی صلاحیتوں کا لوہا منوایا اور اپنی ذہانت کی خوب دھاک بٹھائی، مردم خیز ضلع کوٹلی آزاد جموں و کشمیر کی مٹی سے تعلق رکھنے والے ایک اور نوجوان نے ایک بار پھر اپنی صلاحیتوں کا لوہا منواتے ہوئے نہ صرف اپنے علاقے کا نام دنیا بھر میں بلند کیا بلکہ اپنے والدین آزاد جموں و کشمیر و پاکستان کا نام دنیا بھر میں روشن کر دیا۔

معروف صحافی ینگ جرنلسٹ ایسوسی ایشن آزاد جموں وکشمیر کے حقیقی بھانجے عبداللہ سبحانی نے لندن میں اپنی ذہانت قابلیت اور تعلیمی میدان میں کامیابیوں کے جھنڈے گاڑھنے کا سلسلہ جاری رکھتے ہوئے لندن کے بیل ہائی اسکول سکستھ فارم اینڈ فارسٹ کالج سے سکالر شپ کے بعد لندن کی کوئین میری یونیورسٹی میں پہنچ گئے۔

(جاری ہے)

آزاد جموں وکشمیر اور پاکستان میں رہائش پذیر ان کے دوست احباب رشتے داروں اور عوام الناس کی جانب سے مبارکبادوں کے ساتھ ساتھ اہل خانہ کے لیے نیک خواہشات کے پیغامات کا سلسلہ بدستور جاری ہے۔

نوجوان کشمیری طالب علم عبداللہ سبحانی کوٹلی سے تعلق رکھتے ہیں اور لندن میں اپنی والدہ کی زیر نگرانی تعلیمی سفر جاری رکھے ہوئے ہیں۔ان دنوں اپنے ریسرچ ورک کے لیے آبائی وطن آزاد کشمیر آئے ہوئے ہیں۔ڈیزاسٹر مینجمنٹ اور جیل خانہ جات کے تقابلی جائزے اور مطالعے کے لیے انہوں نے سیکرٹری ایس ڈی ایم اے چوہدری فرید اور آئی جی جیل خانہ جات طاہر ممتاز سے ان کے دفاتر میں ملاقات کی۔

دوران ملاقات آزاد کشمیر اور برطانیہ میں ان محکمہ جات کی کارکردگی کے تقابل پر سیر حاصل گفت و شنید کی۔عبداللہ سبحانی کو وزیر ہائر ایجوکیشن ملک ظفر کی جانب سے خصوصی طور پر وزیر ہائر ایجوکیشن کے دفتر بھی مدعو کیا گیا، جہاں پر دیگر مکاتب فکر کے احباب بھی موجود تھے۔اس موقع پر وزیر ہائر ایجوکیشن ملک ظفر نے عبداللہ سبحانی کو ان کی کامیابی پر مبارکباد دیتے ہوئے کہا کہ عبداللہ سبحانی کی کامیابی نے بیرون ملک کشمیریوں کا نام روشن کیا ہے۔

تعلیمی میدان میں کشمیری جوان کسی سے کم نہیں ہیں۔یاد رہے کہ گیارہ ستمبر کو بیل ہائی اسکول سکستھ فارم فارسٹ کالج اینڈ یونیورسٹی کیمپس کی جانب سے عبداللہ سبحانی کو ایوارڈ کی تقریب بھی منعقد کی جا رہی ہے۔عبداللہ سبحانی نے مظفرآباد دورے کے دوران میڈیا سے بات چیت کرتے ہوئے اپنی کامیابی کو اپنی والدہ کے نام سے منسوب کرتے ہوئے کہا کہ ان کی پوری توجہ اپنی پڑھائی پر ہے اور اپنی ڈگری مکمل کرنے کے بعد اسکو انسانیت کی فلاح وبہبود کے لیے کام میں لانا چاہتے ہیں۔

عبداللہ سبحانی آزاد کشمیر کے معروف صحافی سردار نعیم چغتائی کے بھانجے ہیں۔اعوان اتحاد آزاد جموں وکشمیر کے صدر ڈاکٹر لطف الرحمن اعوان، ضلعی صدر عزیز اعوان،عارف اعوان چہلوء،سفیر اعوان،ملک واجد زمان،ملک لیاقت بشیر فاروقی،منیر اعوان،خورشید اعوان،بنت حوا ایکشن کمیٹی کی صدر محترمہ نازیہ ملک،چئیر پرسن و بانی راہنما المقدّس ویلفئیر سوسائٹی شازیہ اعوان،ڈاکٹر فرزانہ فرح،اقراء ملک سمیت دیگر قوم قبیلے نے عبداللہ سبحانی اور انکی والدہ سمیت معروف صحافی نعیم چغتائی کو عمیق قلب سے مبارکباد پیش کرتے ہوئے انکی مزید کامیابیوں کے لیے دعا کی ہے۔