Live Updates

سیلاب متاثرین تک صاف پانی کی فراہمی کا دائرہ کار بڑھا دیا گیا

منگل 9 ستمبر 2025 19:10

لاہور (اُردو پوائنٹ اخبارتازہ ترین - آن لائن۔ 09 ستمبر2025ء) وزیر اعلیٰ پنجاب مریم نواز شریف کی خصوصی ہدایات پر سیلاب زدگان تک پینے کے صاف پانی کی فراہمی کے لیے اقدامات مزید تیز کر دیے گئے ہیں۔ ترجمان محکمہ ہاؤسنگ کے مطابق پنجاب صاف پانی اتھارٹی نے متعلقہ ضلعی انتظامیہ کے اشتراک سے متاثرہ علاقوں میں ریلیف آپریشن کا دائرہ کار بڑھا دیا ہے اور 19 لیٹر کی ایک لاکھ سے زائد پانی کی بوتلیں متاثرہ شہریوں تک پہنچائی جائیں گی۔

ترجمان کے مطابق اب تک مختلف اضلاع میں مجموعی طور پر 7 لاکھ 27 ہزار لیٹر پانی تقسیم کیا جا چکا ہے، جس سے 2 لاکھ 42 ہزار 333 متاثرین کو صاف پانی فراہم کیا گیا۔ گزشتہ روز ہی صاف پانی اتھارٹی نے 1 لاکھ 87 ہزار 500 لیٹر پانی متاثرہ عوام تک پہنچایا۔ترجمان محکمہ ہاؤسنگ کے مطابق سیلاب متاثرین کو صحت بخش صاف پانی مہیا کرنا حکومت کی اولین ترجیح ہے اور اس مقصد کے لیے صاف پانی کی فراہمی کو مرحلہ وار بڑھایا جا رہا ہے۔

(جاری ہے)

اس کے ساتھ ساتھ الٹرا فلٹریشن ہینڈ پمپس بھی متاثرہ علاقوں میں پہنچائے جا رہے ہیں تاکہ عوام کو بلا تعطل صاف پانی کی فراہمی یقینی بنائی جا سکے۔ترجمان کے مطابق تمام متعلقہ اداروں کے اشتراک سے شہریوں کی حفاظت اور سہولت کو یقینی بنایا جا رہا ہے جبکہ سیلاب متاثرین کی مشکلات کو کم کرنے کے لیے ہنگامی بنیادوں پر اقدامات جاری ہیں۔ سیکرٹری ہاؤسنگ نورالامین مینگل خود آپریشن کی نگرانی کر رہے ہیں تاکہ متاثرہ خاندانوں کو ریلیف جلد از جلد فراہم ہو سکے۔