نیپال، سپریم کورٹ کی سابق چیف جسٹس سوشیلا کرکی عبوری حکومت سنبھالنے پر آمادہ

جمعرات 11 ستمبر 2025 13:12

کھٹمنڈو(اُردو پوائنٹ اخبارتازہ ترین - این این آئی۔ 11 ستمبر2025ء)نیپال کے سپریم کورٹ کی سابق چیف جسٹس سوشیلا کرکی نے عبوری حکومت سنبھالنے پر آمادگی ظاہر کردی جبکہ فوج نے فسادات اور ہنگامہ آرائی پر قابو پالیا ہے۔ نیپالی حکومت نے پچھلے ہفتے سوشل میڈیا کی بڑی ویب سائٹس بند کردی تھیں جس پر نوجوانوں کے مظاہرے شروع ہوئے تھے اور انہیں جین زی انقلاب کا نام دیا گیا تھا۔

(جاری ہے)

نیپال میں ہنگامہ آرائی اور فسادات کے دوران تیس افراد ہلاک اور سیکڑوں زخمی ہوئے تھے اور کئی سرکاری عمارتوں کو آگ لگادی گئی تھی۔ مظاہرین کی تحریک سے وابستہ رہنماوں نے فوجی قیادت سے ملاقات کی تھی جس میں مستقبل کے حوالے سے بات چیت کی گئی۔جین زی کا مطالبہ ہے کہ ملک میں قبل از وقت انتخابات کرائے جایئں اور جین زی ہی نے سابق چیف جسٹس سوشیلا کرکی کا نام عبوری حکومت کی قیادت کے لیے پیش کیا تھا۔ کرکی نے عبوری قیادت سنبھالنے پر آمادگی بھی ظاہر کردی ۔