الیکشن کمیشن نے کنٹونمنٹ بورڈ راولپنڈی وارڈ نمبر 8 کی خالی جنرل نشست پر ضمنی الیکشن کا شیڈول

جمعرات 11 ستمبر 2025 16:13

راولپنڈی (اُردو پوائنٹ اخبارتازہ ترین - اے پی پی۔ 11 ستمبر2025ء) الیکشن کمیشن نے کنٹونمنٹ بورڈ راولپنڈی وارڈ نمبر 8 کی خالی جنرل نشست پر ضمنی الیکشن کا شیڈول جاری کر دیا ہے۔ یہ نشست ممبر کنٹونمنٹ بورڈ حافظ حسین احمد کے انتقال کے باعث خالی ہوئی تھی۔ شیڈول کے مطابق 10 سے 12 ستمبر تک کاغذات نامزدگی وصول کیے جائیں گے جبکہ 15 اور 16 ستمبر کو ان کی جانچ پڑتال کے بعد منظور شدہ امیدواروں کی فہرست جاری ہو گی۔

17 سے 19 ستمبر تک کاغذات نامزدگی کے خلاف اپیلیں دائر کی جا سکیں گی جنہیں 22 ستمبر تک نمٹا دیا جائے گا۔

(جاری ہے)

امیدواروں کی حتمی فہرست اور انتخابی نشانات 24 ستمبر کو الاٹ کیے جائیں گے۔ ضمنی الیکشن 5 اکتوبر کو ہوں گے اور ریٹرننگ آفیسر ارشد خان 7 اکتوبر کو نتائج کا اعلان کریں گے جبکہ اسسٹنٹ ریٹرننگ آفیسر کے فرائض ناصر کمال انجام دیں گے۔ ریٹرننگ آفیسر کے مطابق اس وارڈ میں کل ووٹرز کی تعداد 34 ہزار 92 ہے جن میں 17 ہزار 134 مرد اور 16 ہزار 958 خواتین شامل ہیں۔ الیکشن کے لیے مجموعی طور پر 26 پولنگ اسٹیشن قائم کیے جائیں گے جن میں مردوں کے لیے 40 اور خواتین کے لیے 37 پولنگ بوتھ ہوں گے۔ اب تک 17 امیدواروں نے کاغذات نامزدگی وصول کیے ہیں جبکہ 3 امیدوار اپنے کاغذات نامزدگی جمع کروا چکے ہیں۔