وزیراعلی سندھ مراد علی شاہ کا کراچی کے ماسٹر پلان پر کام کرنے کا اعلان

کراچی (اُردو پوائنٹ اخبارتازہ ترین - این این آئی۔ 11 ستمبر2025ء)وزیر اعلی سندھ سید مراد علی شاہ نے کہا ہے کہ شہر کی بے ہنگم توسیع نے سنگین مسائل پیدا کیے ہیں تاہم ان کی حکومت، عالمی بینک کے تعاون سے ایک جامع ماسٹر پلان پر عملدرآمد کر رہی ہے جس میں ٹرانسپورٹ، پانی کی فراہمی، نکاسی آب، کچرا اٹھانا اور دیگر امور شامل ہیں۔انہوں نے یہ بات بانی پاکستان قائداعظم محمد علی جناح کے 77ویں یومِ وفات پر ان کو خراج عقیدت پیش کرنے کے بعد میڈیا سے گفتگو کرتے ہوئے کہی۔

وزیر اعلی نے مزارِ قائد پر حاضری دی، پھولوں کی چادر چڑھائی، فاتحہ خوانی کی اور قائداعظم کی قربانیوں کو خراج تحسین پیش کیا۔ اس موقع پر صوبائی کابینہ کے اراکین بھی ان کے ہمراہ تھے۔کراچی کی بے ربط شہری توسیع کے حوالے سے وزیر اعلی نے انسان دوست حل تلاش کرنے کی ضرورت پر زور دیا۔

(جاری ہے)

انہوں نے کہا کہ لیاری ندی کے دورے کے دوران بے شمار غیر رسمی آبادیاں نظر آئیں اور رہائشیوں کو وسائل کی فراہمی کے بغیر بے دخل نہ کرنا ہماری ترجیح ہے۔

انہوں نے بتایا کہ سندھ حکومت نے عالمی بینک کے تعاون سے کراچی ماسٹر پلان کی اسٹڈیز مکمل کر لی ہیں جن میں ٹرانسپورٹ، بجلی، پانی، نکاسی آب، کچرا اٹھانے اور عمومی ترقی شامل ہے۔ انفراسٹرکچر کی بہتری کے منصوبوں میں بھٹو روڈ کی تعمیر بھی شامل ہے جو قیوم آباد کو موٹر وے ایم 9 سے ملانے والی 39 کلومیٹر طویل شاہراہ ہے۔ ان کے مطابق 37 کلومیٹر نئی سڑک اور دو کلومیٹر طویل لنک روڈ تعمیر کے مراحل میں ہیں جبکہ 15 کلومیٹر حصہ محفوظ اور استعمال کے قابل ہے۔

مراد علی شاہ نے کہا کہ پانی کے دبا ؤکے مسائل کو حل کرنے کے لیے حفاظتی دیواریں تعمیر کی گئی ہیں جن کی مانیٹرنگ وہ خود کر رہے ہیں۔ انہوں نے بتایا کہ شاہراہ بھٹو منصوبے کی مالیت 52 ارب روپے ہے جو سرکاری و نجی اشتراک سے مکمل ہو رہا ہے اور اس میں ڈویلپرز، انجینئرز، مالیاتی ادارے اور پراجیکٹ مینیجر شامل ہیں۔ انہوں نے منصوبے کی کامیابی اور عوامی پذیرائی پر اللہ تعالی کا شکر ادا کیا۔

وزیر اعلی سندھ نے کہا کہ پاکستان صرف اسی صورت میں ترقی اور استحکام کی طرف بڑھ سکتا ہے جب ہم قائداعظم کے اصولوں پر عمل کریں۔ انہوں نے خصوصا نوجوانوں کو محنت اور لگن کو اپنانے کی تاکید کی تاکہ بانی پاکستان کا خواب پورا ہو سکے۔ ان کا کہنا تھا کہ پاکستان قائداعظم کی قربانیوں کا نتیجہ ہے، ہمیں ان کے اتحاد، ایمان اور قربانی کے اصولوں پر ثابت قدم رہنا ہوگا۔

انہوں نے آنے والی نسلوں کے لیے روشن مستقبل اور خوشحالی کی دعا بھی کی۔انہوں نے شہید ذوالفقار علی بھٹو کو خراج عقیدت پیش کرتے ہوئے کہا کہ انہوں نے پاکستان کو ایٹمی طاقت بنایا جبکہ شہید بے نظیر بھٹو نے ملک کے دفاع کو مضبوط کیا۔مراد علی شاہ نے کہا کہ حالیہ مئی میں قوم بھارتی جارحیت کے مقابلے میں متحد کھڑی ہوئی۔ انہوں نے مقبوضہ کشمیر میں بھارتی مظالم اور فلسطین و قطر میں اسرائیلی جارحیت کی شدید مذمت کی اور مسلم امہ میں اتحاد پر زور دیا۔

ان کا کہنا تھا کہ جس طرح پاکستان نے مودی کے اقدامات کو چیلنج کیا، اسی طرح امتِ مسلمہ کو متحد ہو کر اسرائیلی جارحیت کا خاتمہ کرنا ہوگا۔وزیر اعلی سندھ نے موجودہ سیلابی صورتحال پر بات کرتے ہوئے کہا کہ پنجاب، خیبر پختونخوا اور گلگت بلتستان سیلاب سے متاثر ہوئے ہیں تاہم پاکستان پیپلز پارٹی کی قیادت میں سندھ حکومت نقصانات کو کم سے کم کرنے کے لیے ہر ممکن اقدامات کر رہی ہے۔

انہوں نے کہا کہ انسانی جانوں کا تحفظ اور بیراجوں و بندوں کی حفاظت اولین ترجیح ہے۔ ان کے مطابق وفاقی ادارے اور نیشنل ڈیزاسٹر مینجمنٹ اتھارٹی وزیر اعظم کی ہدایات پر ان اقدامات میں تعاون کر رہے ہیں۔وزیر اعلی نے اتحاد اور مثبت مکالمے پر زور دیتے ہوئے کہا کہ ترقی یافتہ ممالک بھی قدرتی آفات کا سامنا کرتے ہیں۔ انہوں نے کہا کہ اجتماعی کوششوں اور عوامی تعاون سے ہی ہم ان آزمائشوں پر قابو پا سکتے ہیں۔

ان کا کہنا تھا کہ اللہ تعالی ہم سب پر رحم فرمائے۔سوال و جواب کے سیشن میں وزیر اعلی سندھ نے میڈیا کو حالیہ سیلابی انتظامات، انفراسٹرکچر کی ترقی اور صوبے میں پانی کے منصوبوں پر تفصیلی بریفنگ دی۔ انہوں نے 2010 کے شدید سیلاب کو یاد کرتے ہوئے کہا کہ اس دوران ٹوڑی بند ٹوٹ گیا تھا اور سکھر بیراج کو سنگین خطرہ لاحق ہوا تھا۔ اس کے بعد چھوٹے اور درمیانے درجے کے سیلاب آئے لیکن اللہ کے فضل اور حفاظتی اقدامات کے باعث صورتحال قابو میں رہی۔

سکھر بیراج، جو 1932 میں ماہر انجینئرز نے تعمیر کیا تھا، ایک غیر معمولی صورتحال سے گزرا جب تین سال بعد 10 دروازے بند کرنا پڑے۔ ان دروازوں کو محض بند کرنے کے بجائے کنکریٹ سے سیل کیا گیا، جو انجینئرنگ کا ایک منفرد حل تھا۔ بیراج کی اصل گنجائش 15 لاکھ کیوسک پانی گزارنے کی تھی لیکن دروازے بند ہونے کے بعد یہ کم ہو کر 9 لاکھ 60 ہزار کیوسک رہ گئی۔

اب تک 11 لاکھ کیوسک پانی اس بیراج سے گزر چکا ہے۔وزیر اعلی نے کہا کہ بیراج کی بحالی کے لیے سب سے اہم کام گیٹس کی تبدیلی ہے جو اس کی پائیداری اور گنجائش کے لیے ناگزیر ہے۔ پہلی بار بیراج کے فرش کو کھولا گیا اور مرمت کی گئی تاکہ اس کی عمر میں اضافہ کیا جا سکے۔ انہوں نے مزید بتایا کہ بدلتے موسمی حالات کے پیش نظر بیراج کی گنجائش بڑھانے کے لیے مطالعات جاری ہیں۔

ایک سوال کے جواب میں مراد علی شاہ نے بتایا کہ سیلاب پر قابو پانے کے لیے خیرپور میں الرا جاگیر بند پر کام جاری ہے اور 45 حساس مقامات کو بھی ایڈریس کیا جا رہا ہے۔ ماتلی، ٹھٹھہ، سجاول اور لاڑکانہ کے دائیں کنارے پر بھی مختلف بندوں پر کام ہو رہا ہے جو صوبائی سطح پر سیلاب سے بچا کے جامع اقدامات کا حصہ ہے۔وزیر اعلی سندھ نے اللہ تعالی کی حفاظت پر شکر ادا کرتے ہوئے کہا کہ حالیہ چیلنجز کا مقابلہ کرنے میں پوری انتظامیہ نے بھرپور محنت اور لگن کا مظاہرہ کیا۔

انہوں نے ماضی کے واقعات کا ذکر کرتے ہوئے کہا کہ 2006 اور 2007 میں کراچی میں شدید بارشوں کے باعث جانی نقصان اور شہری سیلاب سامنے آیا تھا۔انہوں نے کہا کہ 2020 میں شہر میں ریکارڈ بارش ہوئی جس کے نتیجے میں نشیبی علاقوں میں پانی جمع ہوا۔ وزیر اعلی کے مطابق انہوں نے خود صورتحال کی نگرانی کی اور اگلے ہی دن تیز نکاسی آب کا مشاہدہ کیا۔19اگست کی بارش کے حوالے سے وزیر اعلی نے کہا کہ بارش پیش گوئی سے زیادہ ہوئی لیکن رات 9 بجے تک پانی کی نکاسی مثر انداز میں مکمل ہوگئی۔

انہوں نے بتایا کہ حالیہ بارشوں کے دوران ریسکیو 1122، پی ڈی ایم اے، ضلعی انتظامیہ، پولیس اور منتخب نمائندے پوری طرح متحرک رہے۔کراچی کے مختلف علاقوں میں سیلابی صورتحال پر بات کرتے ہوئے انہوں نے کہا کہ سندھ اور بلوچستان کی سرحدی علاقوں میں سیلابی پیش گوئیاں نہیں کی گئی تھیں۔ پانی فیڈ چینلز کے ذریعے موٹروے، سپر ہائی وے اور سعدی ٹان میں داخل ہوا۔

انہوں نے مزید کہا کہ ایم 9 موٹروے پر موجود انفراسٹرکچر مسائل کو دور کرنے کے لیے اقدامات جاری ہیں جبکہ پانی کے گزرنے کی اجازت زیر غور ہے۔وزیر اعلی نے بتایا کہ 2011، 2012 اور 2022 کی بارشوں اور سیلاب کے بعد اقدامات کیے گئے جن میں رکاوٹیں دور کرنا اور منچھر جھیل سمیت بڑے آبی ذخائر کے دائیں اور بائیں کناروں پر انفراسٹرکچر کو بہتر بنانا شامل ہے۔

انہوں نے تسلیم کیا کہ دنیا بھر میں سیلاب پر قابو پانا مشکل ہے اور اس کے لیے اتحاد، مثبت رویہ اور مستقل سیاسی عزم ناگزیر ہیں۔ ان کے مطابق پانی کے منصوبے تکنیکی مہارت کے ساتھ ساتھ پائیدار سیاسی عزم کے بھی متقاضی ہیں۔ضلع دادو میں نئیں گاج ڈیم منصوبے میں تاخیر سے متعلق سوال پر مراد شاہ نے کہا کہ وہ اس مرحلے پر منفی بیان نہیں دیں گے تاہم انہوں نے وفاقی حکومت پر زور دیا کہ منصوبے کی تعمیر میں تیزی لائی جائے۔