ہیڈکوارٹر فرنٹیئر کور خیبرپختونخوا(ساؤتھ)کے زیر اہتمام تاریخی یوتھ کنونشن کا انعقادکیاگیا

جمعرات 11 ستمبر 2025 16:13

ڈیرہ اسماعیل خان (اُردو پوائنٹ اخبارتازہ ترین - اے پی پی۔ 11 ستمبر2025ء) ہیڈکوارٹر فرنٹیئر کور خیبرپختونخوا(ساؤتھ)کے زیر اہتمام تاریخی یوتھ کنونشن کا انعقادکیاگیا۔ جنوبی وزیرستان کے مرکزی شہر میں ایک شاندار یوتھ کنونشن کا انعقاد کیا گیا، جس میں انسپکٹر جنرل فرنٹیئر کور خیبرپختونخوا (ساوتھ)میجر جنرل مہر عمر خان نیازی نے بطور مہمانِ خصوصی شرکت کی۔

اس موقع پر نوجوانوں، اساتذہ، خواتین اور قبائلی عمائدین کی بڑی تعداد شریک ہوئی۔شرکا نے تعلیم، مثبت سرگرمیوں اور علاقے کی سماجی ترقی کے فروغ کے عزم کا اظہار کیا۔ نوجوانوں نے اس بات پر زور دیا کہ وہ اپنی توانائیاں تعلیمی میدان، کھیلوں اور فلاحی کاموں میں صرف کریں گے تاکہ اپنے مستقبل کو بہتر بنا سکیں۔اس کنونشن کے دوران مختلف شعبہ ہائے زندگی میں نمایاں کارکردگی دکھانے والی شخصیات کو اعزازات سے نوازا گیا۔

(جاری ہے)

انسپکٹر جنرل ایف سی (ساؤتھ)نے تقریب کے دوران اعلان کیا کہ انگور اڈہ بارڈر ٹرمینل کو 30 ستمبر 2025 تک تجارت کے لئے دوبارہ کھو ل دیا جائےگا ۔انہوں نے مزید کہا کہ ہونہار طلباء کو آرمی چیف ایجوکیشن پیکیج کے تحت ملک بھر کے آرمی پبلک اسکولز میں تعلیم کے مواقع فراہم کیے جائیں گے۔اسی موقع پر نوجوانوں کے لئے ڈیجیٹل اسکلز کورسز اور طلبا و طالبات کے لئے گرینڈ اسپورٹس فیسٹیول کے انعقاد کا بھی اعلان کیا گیا۔\378