گجرات میں اربوں روپے لگانے والوں سے واسا سسٹم کی ناکامی بارے ضرور پوچھنا چاہئے، بلال یاسین

جمعرات 11 ستمبر 2025 21:42

لاہور (اُردو پوائنٹ اخبارتازہ ترین - اے پی پی۔ 11 ستمبر2025ء) وزیر ہاو سنگ اینڈ اربن ڈویلپمنٹ بلال یاسین نے واسا ہیڈکوارٹر میں ویڈیو لنک اجلاس کی صدارت کی،ڈی جی واسا پنجاب طیب فرید اور تمام واسا کے ایم ڈیز نے موجود صورتحال اور مون سون بارشوں بارے تفصیلی بریفنگ دی۔ گجرات اور سیالکوٹ میں پانی کے بہاو ،نکاسی اور دیگر اقدامات بارے بھی تفصیل سے آگاہ کیا گیا،غیر متوقع بارش، خستہ حال اور بوسیدہ لائنوں کے باعث نکاسی بروقت ممکن نہ ہوسکی۔

(جاری ہے)

وزیر ہاوسنگ نے کہا کہ گجرات میں اربوں روپے لگانے والوں سے واسا سسٹم کی ناکامی بارے ضرور پوچھنا چاہئے، پنجاب کے تمام اضلاع میں ڈی سلٹنگ مہم کا بھرپور آغاز کیا جائے گا، وزیر اعلی پنجاب کی ہدایت پر 6اضلاع کی مشینری اور عملے نے نکاسی آب کو ممکن بنایا گیا۔، انہوں نے واضح کیا کہ گجرات میں بند ٹوٹنے سے شہری علاقوں میں داخل ہونیوالے پانی کو روکنے کیلئے ہنگامی اقدامات اٹھائے گئے۔ انہوں نے مون سون سیزن گزرتے ہی سیوریج لائنوں کی تبدیلی سمیت ترقیاتی کاموں کو برق رفتاری سے مکمل کرنے کی ہدایت کی جبکہ نااہلی اور غفلت کے مرتکب افسران اور کنٹریکٹرز کیخلاف کارروائی کا بھی عندیہ دیا ہے۔