Live Updates

سیلاب متاثرین کی سہولیات کیلئے بروقت اور موثر اقدامات یقینی بنائے جا رہے ہیں۔رانا سکندر حیات

جمعرات 11 ستمبر 2025 22:50

لاہور (اُردو پوائنٹ اخبارتازہ ترین - اے پی پی۔ 11 ستمبر2025ء) وزیر تعلیم رانا سکندر حیات گذشتہ 3روز سے مسلسل ملتان میں موجود ہیں جہاں وہ رات گئے تک ریلیف کے کاموں کی نگرانی کر رہے ہیں۔ رانا سکندر حیات سیلابی صورتحال اور انتظامی سہولیات کا جائزہ لینے کے ساتھ ساتھ ریلیف کیمپوں کا دورہ کر کے متاثرین کی داد رسی میں مصروف ہیں۔ رانا سکندر حیات نے انتظامیہ کو ہدایت کی ہے کہ ریلیف کے امور میں کوئی کسر نہ چھوڑی جائے اور سیلاب متاثرین کی سہولیات کیلئے بروقت اور موثر اقدامات یقینی بنائے جائیں۔

(جاری ہے)

ان کا کہنا ہے کہ کہا کہ ریسکیو ٹیمیں اور ضلعی انتظامیہ ہر لمحہ سیلاب متاثرین کی خدمت میں مصروف رہیں اور ریلیف کیمپوں میں متاثرین کی ضروریات کا خیال رکھا جائے۔انہوں نے کہا کہ ہم سب مل کر اس آزمائش کو عزم و حوصلے کے ساتھ عبور کریں گے۔ انہوں نے کہا کہ ہماری اولین ترجیح متاثرین کی مشکلات کم کرنا اور بچوں کے چہروں پر مسکراہٹ واپس لانا ہے۔وزیرتعلیم نے مزید کہا کہ وزیر اعلی پنجاب کی ہدایت پر ملتان ڈویژن میں ذمہ داری سنبھالی ہے۔ متاثرین کی مدد مکمل ذمہ داری سے کی جا رہی ہے اور ریسکیو اور ریلیف آپریشن تیز رفتاری سے جاری ہے۔ انہوں نے کہا کہ متاثرین کے محفوظ انخلا کیلئے ہر ممکن وسائل بروئے کار لائے جا رہے ہیں۔