یوکرین جنگ: پولینڈ فضائی حدود کی خلاف ورزی خطے کے لیے خطرناک، یو این

اسلام آباد (اُردو پوائنٹ ۔ UN اردو۔ 13 ستمبر 2025ء) پولینڈ کی حدود میں روس کے ڈرون طیاروں کی دراندازی اور نیٹو اتحادیوں کی جانب سے ان کی تباہی نے یوکرین جنگ سے خطے کو لاحق بڑھتے ہوئے خطرات واضح کر دیے ہیں۔

قیام امن اور سیاسی امور کے لیے اقوام متحدہ کی انڈر سیکرٹری جنرل روزمیری ڈی کارلو نے سلامتی کونسل کو بتایا ہے کہ یہ پہلا موقع نہیں جب روس کے ڈرون یوکرین کی حدود سے باہر گئے ہوں تاہم یہ پہلا موقع ہے جب بہت سے ڈرون کسی ہمسایہ ملک کی حدود میں طویل فاصلے تک داخل ہوئے ہیں۔

اس واقعے سے متعلق سلامتی کونسل کو بریفنگ دیتے ہوئے انہوں نے کہا کہ اقوام متحدہ کے پاس اس بارے میں کسی بھی دعوے یا جوابی دعوے کی تصدیق کا کوئی طریقہ نہیں ہے اور ادارہ صرف عوامی طور پر دستیاب معلومات پر ہی انحصار کر سکتا ہے۔

(جاری ہے)

سلامتی کونسل کو یہ بریفنگ روس کی جانب سے یوکرین پر جاری حملوں کے پس منظر میں دی گئی۔ اس موقع پر روزمیری ڈی کارلو نے سلامتی کونسل کو یاد دلایا کہ شہریوں اور شہری تنصیبات پر حملے بین الاقوامی انسانی قانون کے تحت ممنوع ہیں اور انہیں فوری طور پر روکا جانا چاہیے۔

انہوں نے کہا کہ رواں ہفتے کے واقعات خطے کی سلامتی پر اس جنگ کے خطرناک اثرات اور کشیدگی میں اضافے کے خدشے کو واضح کرتے ہیں۔

نیٹو کی کی کارروائی

پولینڈ کے مطابق، 9 اور 10 ستمبر کی درمیانی رات روسی ڈرون طیاروں کی ایک بڑی تعداد نے یوکرین پر حملے کے دوران اس کی فضائی حدود کی خلاف ورزی کی۔

یہ پہلا موقع تھا جب نیٹو اتحادیوں نے ایسے ڈرون طیاروں کو غیر موثر کرنے کے لیے طاقت کا استعمال کیا۔ اس واقعے کے بعد پولینڈ کے حکام نے وارسا اور رزیشوف کے ہوائی اڈوں کو عارضی طور پر بند کرنے اور ملک کے مشرقی حصے میں فضائی ٹریفک پر پابندیوں کی اطلاع دی۔

روس کا مؤقف

روس کی وزارتِ دفاع نے کہا ہے کہ یہ ڈرون یوکرینی اہداف کی جانب بھیجے گئے تھے اور پولینڈ میں کسی جگہ کو نشانہ بنانے کا کوئی ارادہ نہیں تھا۔ بیلاروس کا کہنا ہے کہ بعض ڈرون یوکرین کی جوابی کارروائیوں کے باعث اپنے راستے سے بھٹک گئے اور جیسے ہی وہ پولینڈ کی فضائی حدود کے قریب پہنچے تو اس کے حکام کو خبردار کر دیا گیا تھا۔

اس واقعے کے بعد پولینڈ نے نیٹو معاہدے کی شق 4 کو متحرک کیا جس کے نتیجے میں اس دفاعی عسکری اتحاد کے 32 رکن ممالک کی ہنگامی مشاورت ہوئی۔

یوکرین کے صدر وولودیمیر زیلنسکی کے مطابق، 9 اور 10 ستمبر کے درمیان روس نے یوکرین کے 15 علاقوں پر 400 سے زیادہ ڈرونز اور 40 کروز اور بیلسٹک میزائل داغے جن کے نتیجے میں متعدد شہری ہلاک و زخمی ہو گئے۔