جیکب آباد، حبیب چوک کے قریب 11 ہزار وولٹیج کی تاریں دھماکے سے گر گئیں، شہر رات بھر تاریکی میں ڈوبا رہا

ہفتہ 13 ستمبر 2025 22:19

جیکب آباد (اُردو پوائنٹ اخبارتازہ ترین - این این آئی۔ 13 ستمبر2025ء) جیکب آباد، حبیب چوک کے قریب 11 ہزار وولٹیج کی تاریں دھماکے سے گر گئیں، شہر رات بھر تاریکی میں ڈوبا رہا۔

(جاری ہے)

تفصیلات کے مطابق جیکب آباد کے حبیب چوک کے قریب اچانک زوردار دھماکے کے ساتھ 11 ہزار وولٹیج کی تاریں زمین پر آ گریں، ہائی وولٹیج تاریں پوری رات سڑک پر پڑی رہیں مگر سیپکو کا عملہ جائے وقوعہ پر نہ پہنچ سکا، تاروں کے زمین پر گرنے سے شہریوں میں خوف و ہراس پھیل گیا لوگوں نے اپنی مدد آپ کے تحت علاقے کو بند کرنے اور شہریوں کو قریب آنے سے روکنے کی کوشش کی اس دوران پورا شہر رات بھر بجلی سے محروم رہا اور شہری شدید گرمی میں اذیت میں مبتلا رہے، شہریوں کا کہنا ہے کہ سیپکو کا عملہ مسلسل اطلاع دینے کے باوجود موقع پر نہیں پہنچا جس سے کوئی بڑا سانحہ پیش آسکتا تھا شہریوں نے شدید احتجاج کرتے ہوئے کہا کہ سیپکو حکام کی مجرمانہ غفلت ناقابل برداشت ہے، شہریوں نے کہا کہ آئے روز گیارہ ہزار وولٹیج کی تاریں گرنے کے واقعات ہورہے ہیں جس سے کسی بھی وقت جانی نقصان کا خدشہ ہے، عوام نے مطالبہ کیا کہ شہر میں زبون حال تاریں ہٹاکر نئی تاریں لگائی جائیں۔