ایشیا کپ، بھارت نے پاکستان کو بآسانی 7 وکٹوں سے شکست دے دی

دبئی (اُردو پوائنٹ اخبارتازہ ترین - این این آئی۔ 14 ستمبر2025ء)ایشیا کپ کے چھٹے میچ میں بھارت نے پاکستان کو بآسانی 7 وکٹوں سے شکست دے دی ہے، پاکستانی ٹیم کی بیٹنگ لائن پہلی گیند سے مشکلات کا شکار رہی ،وقتاً فوقتاً بیٹرز کے آئوٹ ہونے کے باعث قومی ٹیم مقررہ 20 اوورز میں 9 وکٹوں کے نقصان پر 127 رنز ہی بنا سکی، بھارت نے پاکستان کے 128 رنز کے ہدف کو بآسانی 3 وکٹوں کے نقصان پر 15.5اوورز میںحاصل کرلیا،ھارتی کپتان سوریا کمار یادیو 47 رنز بنا کر ناٹ آئوٹ رہے،پاکستان کی جانب سے تینوں وکٹیں صائم ایوب نے حاصل کیں۔

دبئی انٹرنیشنل کرکٹ اسٹیڈیم میں کھیلے جانے والے میچ میں پاکستان نے پہلے بیٹنگ کرنے کا فیصلہ کیا، قومی بیٹنگ لائن پہلی گیند سے ہی مشکلات کا شکار رہی، وقتا فوقتا بیٹرز کے آئوٹ ہونے کے باعث پاکستان ٹیم مقررہ 20 اوورز میں 9 وکٹوں کے نقصان پر 127 رنز ہی بنا سکی۔

(جاری ہے)

پاکستان ٹیم کی پہلی وکٹ میچ کی پہلی گیند پر ہی گر گئی، جس میں اوپنر بلے باز صائم ایوب کو بغیر کھاتہ کھولے واپس پویلین لوٹنا پڑا، محمد حارث اگلے ہی اوور میں 3 رنز بناکر جسپریت بمراہ کا شکار بنے۔

فخر زمان اور صاحب زادہ فرحان نے محتاط انداز میں بیٹنگ جاری رکھی تاہم فخر زمان بھی 45 کے مجموعے پر 17 رنز بنا کر آئوٹ ہو گئے۔کپتان سلمان علی آغا بھی زیادہ دیر بھارتی بالرز کے خلاف مزاحمت نہ کر سکے اور صرف 3 رنز بنا کر پویلین واپس لوٹ گئے، حسن نواز 5 اور محمد نواز صفر پر آئوٹ ہوئے جبکہ صفیان مقیم 10 رنز بنا کر بولڈ ہو گئے۔صاحب زادہ فرحان نے 44 گیندوں پر 40 رنز بنا کر بھارتی بالرز کے خلاف کچھ مزاحمت کی، فہیم اشرف 11 رنز بنا کر ایل بی ڈبلیو ہوئے۔

شاہین شاہ آفریدی نے برق رفتار 16 گیندوں پر 4 چھکوں کی مدد سے 33 رنز بنا کر قومی ٹیم کے مجموعے میں اضافہ کیا اور اس طرح پاکستانی ٹیم مقررہ 20 اوورز میں 9 وکٹوں کے نقصان پر 127 رنز ہی بنا سکی۔بھارت کی جانب سے کلدیپ یادو 3 وکٹیں حاصل کر کے نمایاں رہے، اکثر پٹیل اور جسپریت بمراہ نے 2،2 وکٹیں اپنے نام کیں۔بعد ازاں بھارت نے پاکستان کے 128 رنز کے ہدف کو بآسانی 3 وکٹوں کے نقصان پر حاصل کر لیا، بھارتی کپتان سوریا کمار یادیو 47 رنز بنا کر ناٹ آئوٹ رہے۔اوپنر بلے باز ابھیشک شرما اور تلک ورما 31،31 جبکہ شبمن گل 10 رنز بنا کر آئوٹ ہوئے، تینوں بیٹرز کو صائم ایوب نے اپنے شکار بنایا۔