کراچی‘خیابان عرفات میں ملزمان پولیس اہلکار کو اغوا کرکے فرار

؂ ریڈ زون ضلع جنوبی میں ڈیفنس خیابان عرفات میں پولیس موبائل میں موجود اہلکار مشکوک گاڑی کی تلاشی لے رہے تھے

پیر 15 ستمبر 2025 14:04

کراچی (اُردو پوائنٹ اخبارتازہ ترین - این این آئی۔ 15 ستمبر2025ء)کراچی کے علاقے ڈیفنس خیابان عرفات مشکوک افراد نے فائرنگ کی اور ہیڈ کانسٹیبل کو یرغمال بنا کر اپنے ساتھ لے گئے جسے کچھ دیر بعد رہا کر دیا گیا۔کراچی کے ریڈ زون ضلع جنوبی میں ڈیفنس خیابان عرفات میں پولیس موبائل میں موجود اہلکار مشکوک گاڑی کی تلاشی لے رہے تھے کہ اس دوران ایک پولیس اہلکار کو اسلحہ کے زور پر اغوا کر لیا گیا۔

پولیس حکام کے مطابق ایک مشکوک گاڑی کو دیکھ کر گشت پر مامور پولیس کار تلاشی کے لیے گئی اور پولیس کار سے اتر کر اہلکار مشکوک گاڑی کے قریب پہنچا، اس دوران مشکوک گاڑی کے قریب پہلے سے موجود شخص نے اہلکار اسحاق جتوئی کو اسلحہ کے زور پر یرغمال بنالیا۔پولیس موبائل میں تین اہلکار سوار تھے اور اغوا کے بعد ملزمان اسحاق جتوئی کو اپنے ساتھ لے گئے۔

(جاری ہے)

واقعہ کے فوراً بعد پولیس نے علاقے میں سرچ آپریشن شروع کر دیا اور سی سی ٹی وی فوٹیج حاصل کرنے کی کوشش کی تاکہ حملہ آوروں کی شناخت کی جا سکے تاہم ملزمان نے ہیڈ کانسٹیبل اسحاق جتوئی کو نیو سبزی منڈی کے قریب چھوڑ دیا اور خود فرار ہو گئے۔ اس کے بعد مغوی اہلکار ساحل پولیس اسٹیشن پہنچ گیا، اسحاق جتوئی پر تشدد بھی کیا گیا تھا۔ایس ایس پی ساؤتھ مہزور علی نے میڈیا سے گفتگو کرتے ہوئے بتایا کہ واقعہ مشکوک گاڑی کو چیک کرنے کے دوران پیش آیا، مشکوک گاڑی میں سوار افراد نے پولیس اہلکاروں پر فائرنگ کی۔

ان کا کہنا تھا کہ فائرنگ کے تبادلے کے دوران ہیڈ کانسٹیبل کو یرغمال بنا لیا گیا، یرغمال اہلکار کو موبائل لوکیشن کی مدد سے تلاش کیا جا رہا تھا کہ کار سوار ملزمان اہلکار کو نیو سبزی منڈی کے قریب چھوڑ کر فرار ہو گئے۔ایس ایس پی کا کہنا تھا کہ واقعہ کے حوالے سے مقدمہ درج کیا جارہا ہے، جبکہ گذری میں پولیس موبائل پر فائرنگ کا واقعہ شفٹ کی تبدیلی کے دوران پیش آیا۔انہوں نے کہا کہ متاثرہ موبائل میں ایک اہلکار موجود تھا جو دوسرے اہلکار کو لینے جا رہا تھا کہ ملزم نے پولیس موبائل پر فائرنگ کی اور فرار ہو گیا، دونوں واقعات میں ملوث کسی ملزمان کو گرفتار نہیں کیا جا سکا۔