اسپیکر قومی اسمبلی کی خصوصی دعوت پر مالدیپ کی عوامی مجلس کا پارلیمانی وفدآج پاکستان پہنچے گا

پیر 15 ستمبر 2025 20:10

Yاسلام آباد(اُردو پوائنٹ اخبارتازہ ترین - آن لائن۔ 15 ستمبر2025ء) اسپیکر قومی اسمبلی سردار ایاز صادق کی دعوت پر مالدیپ کی عوامی مجلس کا پارلیمانی وفد، اسپیکر عوامی مجلس عبدالرحیم عبداللہ کی قیادت میں،آج 16 ستمبر 2025ء کو پانچ روزہ سرکاری دورے پر پاکستان پہنچے گا۔یہ دورہ پاکستان اور مالدیپ کے مابین پارلیمانی اور سیاسی تعلقات کو مزید مستحکم بنانے کی جانب ایک اہم قدم ہے۔

دونوں ممالک کے درمیان ہمیشہ سے قریبی تعلقات قائم رہے ہیں جو مشترکہ عقائد، ثقافتی ہم آہنگی اور باہمی احترام پر مبنی ہیں۔ مالدیپ کے پارلیمانی وفد کا دورہ پارلیمانی سطح پر تعاون کو فروغ دینے کے عزم کی غمازی کرتا ہے۔پاکستان میں قیام کے دوران، وفد اسپیکر قومی اسمبلی سردار ایاز صادق اور ملکی سیاسی قیادت سے ملاقاتیں کرے گا۔

(جاری ہے)

علاوہ ازیں، وفد پاکستان-مالدیپ پارلیمانی فرینڈشپ گروپ اور ارکانِ پارلیمنٹ سے بھی ملاقاتیں کرے گا۔

ان ملاقاتوں میں قانون سازی کے میدان میں تعاون، عوامی روابط اور علاقائی تعاون کو فروغ دینے پر بات چیت ہوگی۔ پارلیمانی وفد اسلام آباد کے تاریخی اور ثقافتی مقامات کا بھی دورہ کرے گا۔مالدیپ کے پارلیمانی وفد کا یہ دورہ اسپیکر قومی اسمبلی سردار ایاز صادق کی پارلیمانی سفارتکاری کے اقدامات کا حصہ ہے جن کا مقصد پارلیمانی روابط کو فروغ دینا اور دنیا بھر کی مقننہ کے درمیان تعمیری مکالمے کے نئے مواقع فراہم کرنا ہے۔مالدیپ کی پارلیمانی قیادت کا یہ دورہ دوطرفہ تعاون کے نئے دور کے آغاز ثا بت ہو گا اور باہمی تعلقات کو مزید مضبوط بنائے گا اور خطے میں امن و استحکام کے فروغ کا باعث بنے گا۔