گوگل کا برطانیہ میں 6.8 ارب ڈالر کی سرمایہ کاری کا اعلان

منگل 16 ستمبر 2025 10:20

لندن (اُردو پوائنٹ اخبارتازہ ترین - اے پی پی۔ 16 ستمبر2025ء) امریکی انٹرنیٹ سرچ انجن ’’گوگل‘‘ نے اعلان کیا ہے کہ وہ آئندہ دو برسوں کے دوران برطانیہ میں 5 ارب پاؤنڈ (6.8 ارب ڈالر) کی سرمایہ کاری کرے گا تاکہ مصنوعی ذہانت کی مہم کو تقویت دی جا سکے۔ فرانسیسی خبررساں ادارے اے ایف پی کے مطابق گوگل کی جانب سے یہ اعلان امریکی صدر ڈونلڈ ٹرمپ کے برطانیہ کے دورے سے قبل کیا گیا ہے۔

کمپنی کے مطابق یہ سرمایہ کاری سرمایہ جاتی اخراجات، تحقیق و ترقی پر کی جائے گی۔منگل کو گوگل نے والتھم کراس، ایسٹ ہرٹ فورڈشائر میں ایک نیا ڈیٹا سینٹر بھی کھولا جس کے لیے گزشتہ برس ایک ارب ڈالر کی سرمایہ کاری کا اعلان کیا گیا تھا۔ کمپنی کے ترجمان نے بتایا کہ تازہ اعلان اس سرمایہ کاری کے علاوہ ہے۔

(جاری ہے)

صدر ٹرمپ منگل کو برطانیہ کے دوسرے تاریخی ریاستی دورے پر پہنچ رہے ہیں۔

امریکی حکام کے مطابق ٹرمپ جمعرات کو برطانوی وزیراعظم کئیر سٹارمر سے ان کی رہائش گاہ پر ملاقات کریں گے جس میں امریکی ٹیک کمپنیوں کے اعلیٰ سربراہان بھی شریک ہوں گے۔ ان میں این ویڈیا اور چیٹ جی پی ٹی اوپن اے آئی کے سربراہان بھی شامل ہیں۔امریکی حکام کے مطابق اس دورے میں ایک نئی سائنس و ٹیکنالوجی شراکت داری کو اجاگر کیا جائے گا جس میں اربوں ڈالر کی سرمایہ کاری شامل ہوگی۔ برطانیہ اور امریکا کے درمیان 10 ارب پاؤنڈ مالیت کے معاہدوں پر دستخط ہوں گے جن میں ’’ورلڈ لیڈنگ ٹیک پارٹنرشپ‘‘ بھی شامل ہے۔برطانوی وزیرِاعظم سٹارمر اس سے قبل امریکی مالیاتی اداروں پے پال اور سٹی گروپ کی جانب سے 1.25 ارب پاؤنڈ کی سرمایہ کاری کے منصوبے کو خوش آئند قرار دے چکے ہیں۔