Live Updates

ْموسمیاتی تبدیلی پاکستان کیلئے بڑا چیلنج ، سیلاب ،خشک سالی براہ راست اثرات ہیں، احسن اقبال

منگل 16 ستمبر 2025 22:58

اسلام آباد(اُردو پوائنٹ اخبارتازہ ترین - این این آئی۔ 16 ستمبر2025ء)وفاقی وزیر منصوبہ بندی احسن اقبال نے کہا ہے کہ سیلاب کے نقصانات کا تخمینہ صوبائی حکومتوں کے ساتھ مربوط انداز میں تیار کیا جائے گا ، دس روز میں سیلابی نقصانات کا ابتدائی تخمینہ مکمل کیا جائے گا، میڈیا سیلا ب سے ہونے والے نقصانات پر قیاس آرائیوں سے گریز کرے، درست اعداد و شمار جلد سامنے آئیں گے۔

انہوں نے یہ بات منگل کو یہاں سیلاب کے نقصانات کا اندازہ لگانے کیلئے کمیٹی کے اجلاس کی صدارت کرتے ہوئے کہی۔ اجلاس میں 2025 کے سیلاب سے نقصانات کے تخمینے کا جائزہ لیا گیا۔ اجلاس میں وفاقی وزیر خزانہ محمد اورنگزیب ، چیئرمین این ڈی ایم اے ، سیکرٹری وزارت موسمیاتی تبدیلی اور صوبائی حکومتوں کے چیف سیکرٹریز نے شرکت کی۔

(جاری ہے)

صوبائی حکومتوں کی جانب سے اجلاس میں بتایا گیا کہ سیلابی نقصانات کا حتمی تخمینہ پانی اترنے کے بعد ممکن ہو گا۔

وفاقی وزیر احسن اقبال نے کہا کہ سیلاب کے نقصانات کا تخمینہ صوبائی حکومتوں کے ساتھ مربوط انداز میں تیار کیا جائے گا ، دس روز میں سیلابی نقصانات کا ابتدائی تخمینہ مکمل کیا جائے گا، میڈیا سیلابی نقصانات پر قیاس آرائیوں سے گریز کرے، درست اعداد و شمار جلد سامنے آئیں گے۔ انہوں نے کہا کہ سیلاب متاثرہ علاقوں میں بحالی کا کام جاری ہے ، وفاقی اور صوبائی ادارے مل کر سیلاب زدہ علاقوں میں امدادی کارروائیاں سرانجام دے رہے ہیں ، اس بار بھی 2022کی طرز پر قدرتی آفات کے بعد نقصانات اور ضروریات کا تخمینہ عالمی اداروں کو شامل کر کے لگایا جائے گا ۔

احسن اقبال نے کہا کہ سیلاب سے متاثرہ علاقوں میں درست اور شفاف اعداد و شمار کی بنیاد پر امدادی اقدامات کئے جائیں گے۔ انہوں نے کہا کہ موسمیاتی تبدیلی پاکستان کے لئے بڑا چیلنج ہے، سیلاب اور خشک سالی موسمیاتی تبدیلی کے براہِ راست اثرات ہیں ۔ انہوں نے کہا کہ بھارت کی جانب سے قدرتی آفت میں بھی سیاست کی گئی ، موسمیاتی تبدیلی سے پاکستان کے گلیشیئرز تیزی سے پگھل رہے ہیں اور اس سے سیلاب کے خطرات بڑھ گئے ہیں۔ انہوں نے کہا کہ موسمیاتی تبدیلی کے چیلنج سے نمٹنے کے لئے قومی منصوبے پر کام جاری ہے۔