اے پی پی میگا کرپشن کیس ، گرفتار 7 ملزمان 3 روزہ جسمانی ریمانڈ پر ایف آئی اے کے حوالے

بدھ 17 ستمبر 2025 16:33

اسلام آباد (اُردو پوائنٹ اخبارتازہ ترین - اے پی پی۔ 17 ستمبر2025ء) سول جج جوڈیشل مجسٹریٹ احمد شہزاد گوندل نے اے پی پی میگا کرپشن کیس میں گرفتار 7 ملزمان کو 3 روزہ جسمانی ریمانڈ پر ایف آئی اے کے حوالے کردیا۔ بدھ کو وفاقی تحقیقاتی ادارہ (ایف آئی اے ) نے ملزم محمد غواث ، عمران منیر، اظہر فاروق، طاہر گھمن، خرم شہزاد، ادریس چوہدری اور ساجد علی وڑائچ کو عدالت پیش کر کے موقف اختیار کیا کہ ملزمان سے ریکوری اور ریکارڈ سمیت مقدمہ کی تہہ تک پہنچنے کےلئے مزید تفتیش درکار ہے لہٰذا ملزمان کو 14 روزہ جسمانی ریمانڈ پر ایف آئی اے کے حوالے کیا جائے ، دوران سماعت ملزمان کے وکلا نے جسمانی ریمانڈ کی مخالف کی۔

قومی خبر رساں ادارہ اے پی پی کی جانب سے حسنین حیدر تھہیم ایڈووکیٹ ، خرم بٹ اور روحیل اصغر ایڈووکیٹ عدالت پیش ہوئے ۔

(جاری ہے)

روحیل اصغر ایڈووکیٹ نے موقف اختیار کیا کہ گرفتار ملزمان دیگر شریک ملزمان کے ساتھ ملوث ہیں ، انہوں نے جعلی ووچرز بنائے جس کی تحقیقات ضروری ہے اور متعلقہ ملزمان نے بھی فوائد حاصل کئے ہیں ،ان کا ریمانڈ دیا جائے۔ انہوں نے عدالت کو بتایا کہ یہ معاملہ پبلک اکائونٹ کمیٹی میں بھی پیش کیا گیا تھا جس کے بعد ایف آئی آر ہوئی ہے۔

مقدمہ کے تفتیشی آفیسر محمد جنید نے عدالت کو بتایا کہ اے جی پی آر سے ریکارڈ فراہم نہیں کیا جا رہا ، عدالت متعلقہ آفیسرز کو احکامات جاری کرے۔ تفتیشی آفیسر نے بتایا کہ سیلری کریڈٹ شیٹس کا ریکارڈ اور ملزمان سے ریکوری کرنا ہے لہٰذا ملزمان کے جسمانی ریمانڈ کی استدعا منظور کی جائے ۔ فاضل جج احمد شہزاد گوندل کے استفسار پر مقدمہ کے تفتیشی محمد جنید نے بتایا کہ ملزمان کے خلاف 38 کروڑ روپے کی کرپشن کا الزام ہے ، ملزمان کے اکائونٹس میں 17 کروڑ اور 21 کروڑ روپے منتقل ہوئے ہیں جن کی چھان بین کےلئے ملزمان کو مزیدتحویل میں رکھنا ضروری ہے ، جس پر عدالت نے ملزمان کو 3 روزہ جسمانی ریمانڈ پر ایف آئی اے کے حوالے کر دیا۔

واضح رہے کہ ایف آئی اے نے قومی خبر رساں ادارہ اے پی پی میں کرپشن کے الزام میں 16 ملزمان کے خلاف مقدمہ درج کر کے کارروائی کا آغاز کیا تھا۔ یہ بات قابل ذکر ہے کہ گزشتہ روز سپیشل جج سنٹرل ہمایوں دلاور نے 13 ملزمان کی درخواست ضمانت قبل از گرفتاری خارج کرتے ہوئے ملزمان کو گرفتار کرنے کا حکم دیا تھا ۔ ایف آئی اے نے 7 ملزمان کو احاطہ عدالت سے گرفتار کرلیا جبکہ دیگر ملزمان فرار ہونے میں کامیاب ہوگئے۔