Live Updates

انڈسٹری اور اکیڈیمیا کے درمیان روابطے کا فقدان دور کرنا وقت کی اہم ضرورت ہے،مینا خان

جمعرات 18 ستمبر 2025 20:00

پشاور (اُردو پوائنٹ اخبارتازہ ترین - اے پی پی۔ 18 ستمبر2025ء) خیبرپختونخوا کے وزیر برائے اعلیٰ تعلیم مینا خان آفریدی نے کہا ہے کہ انڈسٹری اور اکیڈیمیا کے درمیان روابطے کا فقدان دور کرنا وقت کی اہم ضرورت ہے۔ وہ اقراء نیشنل یونیورسٹی پشاور کے زیر اہتمام منعقدہ دو روزہ دوسری بین الشعبہ ہائے کانفرنس 2025 سے بطور مہمان خصوصی خطاب کر رہے تھے۔تقریب میں وزیراعلیٰ خیبرپختونخوا کے معاون خصوصی برائے آئی ٹی و ڈیجیٹائزیشن شفقت ایاز، وائس چانسلر اقراء نیشنل یونیورسٹی ڈاکٹر ملک تیمور علی، مشیر چانسلر یاسر خورشید، ڈائریکٹر اورک ڈاکٹر شیراز سمیت مختلف جامعات کے اساتذہ، محققین، طلبہ اور انڈسٹری کے نمائندگان نے بھی شرکت کی۔

وزیر برائے اعلیٰ تعلیم مینا خان آفریدی نے اپنے خطاب میں کہا کہ جامعات کی تحقیق کو عملی زندگی سے جوڑنا اور ریسرچ پراڈکٹس کی کمرشلائزیشن وقت کی اہم ضرورت ہے۔

(جاری ہے)

انہوں نے کہا کہ اگر ریسرچ صرف کتابوں اور جرائد تک محدود رہی تو اس کا معاشی اور سماجی فائدہ حاصل نہیں ہو سکے گا۔ اس کے لیے انڈسٹری کو جامعات سے منسلک کرنا ناگزیر ہے۔ انہوں نے کہا کہ بدقسمتی سے خیبرپختونخوا نے ایک طویل عرصہ بدامنی کا سامنا کیا جس کی وجہ سے صوبے کی صنعتیں مشکلات سے دوچار رہیں۔

اب جبکہ امن قائم ہو رہا ہے تو صوبائی حکومت چاہتی ہے کہ تعلیمی ادارے اور انڈسٹری مل کر ترقی کا سفر آگے بڑھائیں۔مینا خان آفریدی نے طلبہ پر زور دیا کہ وہ صرف ڈگری کے حصول کو مقصد نہ بنائیں بلکہ ہنر، نئی سوچ اور اختراعی خیالات کے ساتھ میدان عمل میں آئیں۔ انہوں نے کہا کہ چیئرمین تحریک انصاف عمران خان کے واضح ہدایات ہیں کہ نوجوانوں کو مرکز ترجیح بنایا جائے کیونکہ وہی ملک کا مستقبل ہیں۔

وزیر برائے اعلیٰ تعلیم مینا خان آفریدی نے اس عزم کا اعادہ کیا کہ صوبائی حکومت جامعات کی ریسرچ کو انڈسٹری سے منسلک کرنے کے لیے پالیسی سطح پر مزید اقدامات کرے گی اور اس ضمن میں وسائل اور معاونت فراہم کی جائے گی۔وزیراعلیٰ کے معاون خصوصی برائے سائنس و آئی ٹی ڈاکٹر شفقت ایاز نے تقریب سے خطاب میں کہا کہ صوبائی حکومت نے اب تک 26 محکموں کو ڈیجیٹائزڈ کر دیا ہے جبکہ باقی ماندہ چھ محکموں کی ڈیجیٹائزیشن پر تیزی سے کام جاری ہے۔ انہوں نے کہا کہ جدید ٹیکنالوجی اور ڈیجیٹل سلوشنز کے ذریعے نہ صرف شفافیت کو یقینی بنایا جا رہا ہے بلکہ عوامی خدمات کو تیز اور آسان بنایا جا رہا ہے۔