ھ*رحیم یار خان،مزدور کی اجرت 40ہزار روپے مقرر کردی گئی، ڈسٹرکٹ آفیسر لیبر عامر حیات

&صوبائی وزیر محنت کی محکمہ کو کم از کم اجرت کے نوٹیفکیشن پر عملدرآمد یقینی بنانے کی ہدایات

جمعرات 18 ستمبر 2025 23:00

ؒرحیم یار خان(اُردو پوائنٹ اخبارتازہ ترین - آن لائن۔ 18 ستمبر2025ء) ڈسٹرکٹ آفیسر لیبر عامر حیات نے کہا ہے کہ وزیر اعلیٰ پنجاب مریم نواز شریف کی ہدایت پر کم از کم اجرت 40ہزار روپے مقرر کر دی گئی ہے۔ صوبائی وزیر محنت فیصل ایوب کھوکھر نے محکمہ کو کم از کم اجرت کے نوٹفیکیشن پر عملدرآمد یقینی بنانے کے لئے تمام وسائل کو بروئے کار لانے کی ہدایات جاری کی ہیں۔

انہوں نے بتایا کہ محکمہ لیبر کے انسپکٹرز فیکٹریوں، صنعتی یونٹس اور کاروباری اداروں کو معائنہ کر رہے ہیں او رخلاف ورزی کرنے والوں کے خلاف قانونی کارروائی عمل میں لائی جائے گی۔

(جاری ہے)

انہوں نے کہا کہ حکومت کی جانب سے مقرر کردہ کم از کم اجرت مزدوروں اور صنعتی و دیگر کاروباری مقامات پر کام کرنے والوں کا بنیادی حق ہے جس کی تلفی نہیں ہونے دی جائے گی۔

مکمل اجرت کی فراہمی سے عوام کا معیارزندگی بلند اور پیداوار میں بھی بہتری آئے گی۔ انہوں نے کہا کہ حکومت پنجاب کے احکامات پر عملدرآمد کے لئے محکمہ لیبر رحیم یار خان نے چیمبر آف کامرس، انجمن تاجران، ضلع میں موجود صنعتی یونٹس اور دیگر کاروباری اداروں کو مراسلہ جاری کر دیا ہے کہ وہ حکومتی احکامات پر عملدرآمد کریں بصورت دیگر قانونی کارروائی عمل میں لائی جائے گی