سی پی آئی-ایم کا مودی حکومت کے جمہوریت اورسیکولر ازم پر حملوں پر اظہار تشویش

جمعہ 19 ستمبر 2025 16:06

نئی دلی(اُردو پوائنٹ اخبارتازہ ترین - این این آئی۔ 19 ستمبر2025ء)کمیونسٹ پارٹی آف انڈیاماکسسٹ نے بی جے پی کی بھارتی حکومت کی طرف سے ملک میں جمہوریت اور سیکولرازم پرحملوں پر سخت تشویش کا اظہار کیا ہے۔کشمیرمیڈیاسروس کے مطابق سی پی آئی-ایم نے ایک بیان میں کہا ہے کہ مقبوضہ جموں و کشمیر میں جاری بھارتی ریاستی دہشتگردی ، بنگالی بولنے والے مسلمانوں کے خلاف انتقامی کارروائیاں اور بھارت بھر میں شہری آزادیوں پر قدغن ملک میں جمہوریت کے لیے خطرہ ہے۔

بیان میں ہندوتوا راشٹریہ سویم سیوک سنگھ کے سربراہ پر کڑی تنقید کرتے ہوئے اسے فرقہ وارانہ جذبات بھڑکانے کی ایک دانستہ کوشش قرار دیاگیاہے۔سی پی آئی ایم نے کہا کہ بی جے پی حکومت’’آمریت ، فرقہ وارانہ تقسیم اور دیگر ہندوتواپالیسیوں‘‘کے ذریعے ملک میں جمہوری اقدار کو تباہ کر رہی ہے۔

(جاری ہے)

بیان میں خاص طور پر مقبوضہ جموں و کشمیر کی بگڑتی ہوئی صورتحال سخت تشویش کااظہار کیاگیا اور کہاگیاکہ اگست2019میں خصوصی حیثیت کی منسوخی کے بعد مقبوضہ جموں وکشمیر براہ راست نئی دلی کے زیر انتظام ہے جہاں منتخب نمائندوں کو نظر انداز کیاجارہاہے اور شہری آزادیوں کو بڑی طرح محدود کیا گیا ہے۔

سی پی آئی ایم نے بنگالی بولنے والے مسلمانوں کے خلاف امتیازی سلوک پربھی تشویش ظاہر کی اور کہاکہ بی جے پی کے زیر حکومت ریاستوں میں پولیس اور انتظامیہ بنگالی بولنے والوں کو بغیر ثبوت کے "بنگلہ دیشی" قرار دیکر جبری طورپربے دخل کر رہی ہیں۔