ہمیں ایک آمرانہ نظام میں زندگی گزارنے پر مجبور کیاگیا ہے، میر واعظ

یہ انتہائی باعث افسوس ہے کہ حکومت جب چاہے ہمارے دینی اور شہری حقوق پر قدغن لگا دیتی ہے،رہنماحریت کانفرنس

ہفتہ 20 ستمبر 2025 14:45

سری نگر (اُردو پوائنٹ اخبارتازہ ترین - این این آئی۔ 20 ستمبر2025ء)بھارت کے غیر قانونی زیر قبضہ جموںوکشمیر میں کل جماعتی حریت کانفرنس کے سینئر رہنما میر واعظ عمر فاروق نے کہا ہے کہ بھارتی انتظامیہ کی طرف سے انہیں بار بار گھر میں نظربند کرنا او ر نماز جمعہ کیلئے جامع مسجد جانے سے روکنا اس بات کی نشاندہی کرتا ہے کہ ہمیں ایک آمرانہ نظام میں زندگی گزارنے پر مجبور کیا گیا ہے۔

کشمیر میڈیاسروس کے مطابق میر واعظ عمر فاروق نے جنہیں گزشتہ روز مسلسل دوسرے ہفتے گھر میں نظر بند کر کے نماز جمعہ کی ادائیگی کیلئے سرینگر کی تاریخی جامع مسجد جانے نہیں دیا گیا، ایک ویڈیو پیغام میں کہا کہ یہ انتہائی باعث افسوس ہے کہ حکومت جب چاہے ہمارے دینی اور شہری حقوق پر قدغن لگا دیتی ہے ۔

(جاری ہے)

انہوںنے کہا کہ یہ جمعہ میرے لیے اس لیے بھی اہم تھا کیونکہ میر ے دیرینہ ساتھی ، رفیق اور دوست پروفیسر عبدالغنی بٹ ہم سے جداہو گئے تھے۔

میرواعظ نے کہا کہ یہ افسوسناک ہے کہ ہمیں انکے جنازے میں شریک نہیں ہونے دیا گیا، کم از کم جمعہ کے موقع پر اگر ہم انکے لیے دعا کرتے تو کون سا آسمان ٹوٹ پڑتا۔ انہوںنے کہا کہ کیا حکام اس قدر خوفزدہ ہیں کہ وہ ہمیں اپنے مرحوم رہنمائوں کو الوداع بھی نہیں کرنے دیتے ، ان کیلئے دعا کی اجازت نہیں دیتے ۔ میرواعظنے کہا کہ انتظامیہ کا یہ عمل انتہائی قابل مذمت ہے۔