کشمیر سے بھارتی پارلیمنٹ کے منتخب رکنانجینئر عبدالرشید کی دہلی کی تہاڑ جیل میں بھوک ہڑتال

اتوار 21 ستمبر 2025 12:00

نئی دہلی (اُردو پوائنٹ اخبارتازہ ترین - اے پی پی۔ 21 ستمبر2025ء) بھارت کےغیر قانونی زیر تسلط جموں وکشمیرمیں بارہمولہ کے انتخابی حلقہ سے بھارتی پارلیمنٹ کے نظربند رکن انجینئر عبدالرشید نے کشمیریوں کو انصاف کی فراہمی سے مسلسل انکار کے خلاف دہلی کی تہاڑ جیل میں48گھنٹے کی بھوک ہڑتال شروع کر دی ہے۔

(جاری ہے)

کشمیر میڈیاسروس کے مطابق عوامی اتحاد پارٹی کے ترجمان انعام النبی نے سرینگر میں جاری ایک بیان میں کہا کہ انجینئر رشید نے آج صبح 11بجے علامتی بھوک ہڑتال شروع کردی جیسا کہ انہوں نے جیل خانہ جات کے ڈائریکٹر جنرل کے نام ایک خط میں لکھاتھا۔

انہوں نے کہاکہ احتجاج 22 ستمبر کی صبح تک جاری رہے گا۔انعام النبی نے کہا کہ بھوک ہڑتال کا مقصد بھارتی حکومت کی منافقت کو اجاگرکرناہے، جس نے کشمیری عوام کو درپیش سخت مشکلات، ان کی قربانیوں اور انسانی حقوق کی خلاف ورزیوں پر اپنی آنکھیں بند کر رکھی ہیں۔انہوں نے کہا کہ انجینئر رشید نے بھوک ہڑتال لوگوں کے ضمیر کو جھنجھوڑنے اور انہیں یاد دلانے کے لئے کی ہے کہ مسئلہ کشمیر حل نہ ہونے کی وجہ سے بھارت کےغیر قانونی زیر تسلط جموں و کشمیر میں 1989سے اب تک ہزاروں جانیں ضائع ہو چکی ہیں۔