ملک کے بڑے دریاؤں اور آبی ذخائر میں پانی کی صورت حال جاری، مجموعی ذخیرہ 1 کروڑ 31 لاکھ ایکڑ فٹ سے تجاوز کرگیا

پیر 22 ستمبر 2025 22:37

اسلام آباد (اُردو پوائنٹ اخبارتازہ ترین - آن لائن۔ 22 ستمبر2025ء) واپڈا نے ملک کے اہم آبی ذخائر اور دریاؤں میں پانی کی آمد و اخراج سے متعلق اعداد و شمار جاری کر دیے ہیں، جن کے مطابق تربیلا، منگلا اور چشمہ ریزروائرز میں قابل استعمال پانی کا مجموعی ذخیرہ ایک کروڑ 31 لاکھ 33 ہزار ایکڑ فٹ ریکارڈ کیا گیا ہے۔ ترجمان واپڈا کے مطابق یہ اعداد و شمار ملک میں موجودہ آبی صورت حال کو ظاہر کرتے ہیں جو زراعت، توانائی اور پینے کے پانی کے لیے نہایت اہم ہیں۔

تفصیلات کے مطابق تربیلا کے مقام پر دریائے سندھ میں پانی کی آمد ایک لاکھ ایک ہزار 400 کیوسک جبکہ اخراج ایک لاکھ ایک ہزار کیوسک ریکارڈ کیا گیا۔ منگلا کے مقام پر دریائے جہلم میں پانی کی آمد 18 ہزار 800 کیوسک اور اخراج 9 ہزار کیوسک رہا۔

(جاری ہے)

چشمہ بیراج میں پانی کی آمد ایک لاکھ 43 ہزار 900 کیوسک اور اخراج ایک لاکھ 38 ہزار 100 کیوسک، جبکہ ہیڈ مرالہ کے مقام پر دریائے چناب میں پانی کی آمد 50 ہزار 600 کیوسک اور اخراج 39 ہزار 900 کیوسک ریکارڈ کیا گیا۔

نوشہرہ کے مقام پر دریائے کابل میں پانی کی آمد اور اخراج برابر یعنی 19 ہزار 400 کیوسک ہے۔ واپڈا کے ترجمان نے واضح کیا کہ تربیلا، منگلا اور چشمہ کے مقامات پر پانی کی آمد و اخراج 24 گھنٹے کے اوسط بہاؤ کے مطابق ہے، جبکہ ہیڈ مرالہ سمیت دیگر مقامات کے اعداد و شمار صبح 6 بجے کی رپورٹ پر مبنی ہیں۔ آبی ذخائر کی صورت حال کے مطابق، تربیلا ریزروائر میں پانی کی سطح 1550.00 فٹ اور ذخیرہ 57 لاکھ 28 ہزار ایکڑ فٹ، منگلا میں سطح 1239.75 فٹ اور ذخیرہ 70 لاکھ 94 ہزار ایکڑ فٹ جبکہ چشمہ میں سطح 649.00 فٹ اور ذخیرہ 3 لاکھ 11 ہزار ایکڑ فٹ ریکارڈ کیا گیا ہے۔

ملکی معیشت اور زراعت کے لیے نہایت اہم ان آبی ذخائر میں پانی کی دستیابی تسلی بخش قرار دی جا رہی ہے۔ واپڈا کی جانب سے جاری اعداد و شمار آبی وسائل کی منصوبہ بندی اور انتظام کے لیے کلیدی حیثیت رکھتے ہیں۔