وزیراعظم آزاد کشمیر کی زیر صدارت پارلیمانی پارٹی کا اجلاس ، مجموعی سیاسی صورتحال اور جاری ترقیاتی منصوبوں پر تبادلہ خیال

پیر 22 ستمبر 2025 21:02

اسلام آباد (اُردو پوائنٹ اخبارتازہ ترین - اے پی پی۔ 22 ستمبر2025ء) وزیراعظم آزادجموں وکشمیر چوہدری انوارالحق کی زیرصدارت پارلیمانی پارٹی کا اجلاس منعقد ہوا،اجلاس میں مقبوضہ کشمیر کی موجودہ صورتحال ،خطہ کی مجموعی سیاسی صورتحال اور جاری ترقیاتی منصوبوں پر تفصیلی تبادلہ خیال کیا گیا۔ پارلیمانی پارٹی نے متفقہ طور پر وزیراعظم چوہدری انوارالحق کی قیادت پر مکمل اعتماد کا اظہار کیا ۔

اس موقع پر گفتگو کرتے ہوئے وزیراعظم آزادکشمیرچوہدری انوارالحق نے کہا کہ بیس کیمپ کے طور پر ہماری حکومت کی اولین ترجیح مسئلہ کشمیر ہے ، حکومت نے اس سلسلے میں سپیکر قانون ساز اسمبلی کی سربراہی میں کشمیر کمیٹی قائم کر رکھی ہے جو فعال کردار ادا کر رہی ہے ۔انہوں نے کہا کہ حکومت کسی کو قانون ہاتھ میں لینے کی اجازت نہیں دے گی،شہریوں کی جان و مال کے تحفظ اور آزادانہ نقل و حمل کے ان کے بنیادی حق کو یقینی بنایا جائے گا۔

(جاری ہے)

انہوں نے کہا کہ اس حوالے سے کسی قسم کے جبر یا دھونس کو کسی صورت برداشت نہیں کیا جائے گا ، آئین و قانون سے ماورا کوئی بات قبول نہیں کی جائے گی ،آزادجموں وکشمیر میں ترقیاتی عمل پوری رفتار سے جاری رہے گا،انشاءاللہ آزاد کشمیر کو حقیقی معنوں میں فلاحی ریاست بنایا جائے گا ۔۔پیپلز پارٹی آزادکشمیر کے صدر چوہدری محمد یٰسین ،موسٹ سینئر وزیر کرنل(ر) وقار احمد نور ،ڈپٹی سپیکر چوہدری ریاض گجر اور راجہ فیصل ممتاز راٹھور نے اجلاس میں شرکت کی۔

وزراء حکومت سردار محمد حسین ،نثار انصر ابدالی ،چوہدری یاسر سلطان ،چوہدری رشید ،سردار عامر الطاف سمیت چوہدری ارشد ،چوہدری اظہر صادق ،سردار جاوید ایوب ،میاں عبد الوحید ، چوہدری قاسم مجید ،جاوید اقبال بڈھانوی ،دیوان علی چغتائی ،ملک ظفر ،راجہ صدیق ، عاصم شریف بٹ ،احمد رضا قادری ،اکمل سرگالہ ، تقدیس گیلانی ،مشیر حکومت نبیلہ ایوب نے بھی اجلاس میں شرکت کی ۔