Live Updates

فخرزمان آؤٹ تنازع، پاکستانی ٹیم انتظامیہ نے آئی سی سی سے امپائر کی شکایت کردی

پیر 22 ستمبر 2025 20:54

دبئی (اُردو پوائنٹ اخبارتازہ ترین - این این آئی۔ 22 ستمبر2025ء)دبئی میں ایشیا کپ کرکٹ ٹورنامنٹ میں پاکستانی ٹیم انتظامیہ نے فخر زمان کو متنازع آؤٹ دیے جانے پر آئی سی سی سے ٹی وی امپائر کی باضابطہ شکایت کردی ہے۔ذرائع کے مطابق میچ کے بعد منیجر نوید اکرم چیمہ نے اپنے تحفظات سے میچ ریفری اینڈی پائی کرافٹ کو آگاہ کیا لیکن چونکہ یہ آئی سی سی امپائرز منیجر کا استحقاق ہے اس لیے انہیں بھی اپنے تحفظات سے آگاہ کردیا گیا ہے۔

میچ کے بعد کپتان کی میچ رپورٹ میں بھی پاکستانی ٹیم انتظامیہ نے متنازع فیصلے کو ہائی لائٹ کیا ہے آئی سی سی کے امپائرز منیجر کو بھی ٹیم انتظامیہ نے اپنے تحفظات ظاہر کرتے ہوئے باضابطہ شکایت کردی ہے۔ذرائع کے مطابق اہم ترین میچ میں غیر معروف اور نا تجربہ کار ٹی وی امپائر کا تقرر کیا گیا۔

(جاری ہے)

سری لنکا سے تعلق رکھنے والے امپائر روچیرا پالیاگروگے نے فخر زمان کو متنازع انداز میں کاٹ بی ہائینڈ قرار دیا تھا۔

فیصلے سے میچ میں پاکستانی ٹیم کی پوزیشن متاثر ہوئی۔ فخر 15 رنز پر آئوٹ قرار دیے گئے۔ اس وقت پاکستان کا اسکور 21 رنز تھا واپس جاکر ڈریسنگ روم میں فخر زمان اور ہیڈ کوچ نے فیصلے پر ناراضی کا اظہار کیا تھا۔ٹی وی پر دیکھا گیا کہ ہیڈ کوچ مائیک ہیسن بھی فیصلے سے ناخوش تھے۔ سوشل میڈیا پر کئی سابق کرکٹرز نے متنازع فیصلے کو غلط قرار دیا تھا۔میچ کے بعد پریس کانفرنس میں سلمان علی آغا نے بھی فیصلے پر محتاط انداز میں تنقید کی تھی۔