بنیان مرصوص کے سائے تلے باغ جلسہ، مسلم کانفرنس کا بھرپور کردار ہوگا، مہرالنساء

منگل 23 ستمبر 2025 15:11

مظفرآباد (اُردو پوائنٹ اخبارتازہ ترین - این این آئی۔ 23 ستمبر2025ء)آل جموں و کشمیر مسلم کانفرنس کی سیکرٹری جنرل و سابق ڈپٹی اسپیکر محترمہ مہرالنساء نے کہا ہے کہ تحریکِ آزادی کا بیس کیمپ کسی بھی انتشار، افراتفری اور بدامنی کا متحمل نہیں ہو سکتا۔ مسلم کانفرنس بحیثیت ریاستی جماعت ہمیشہ امن، سیاسی استحکام، باہمی رواداری اور پاکستان و کشمیر کے عوام کی خدمت کے لیے کردار ادا کرتی رہے گی۔

انہوں نے کہا کہ تمام محب وطن قوتیں یکجا ہو کر پاکستان کی نظریاتی اور جغرافیائی سرحدوں کی حفاظت کریں، یہی وقت کی سب سے بڑی ضرورت ہے۔ مسلم کانفرنس ریاست کے عوام کے حقوق کی ضامن اور واحد ریاستی سیاسی قوت ہے جو آزادی، استحکامِ پاکستان اور مقبوضہ جموں و کشمیر کی آزادی کے لیے پرامن سیاسی جدوجہد کر رہی ہے۔

(جاری ہے)

۔ انہوں نے کہا کہ عوام کی بڑی تعداد اپنی نظریاتی وابستگی کا ثبوت دینے کے لیے جلسے میں شریک ہوئی اور یہ اجتماع تحریکِ آزادی کشمیر کو کمزور ہونے سے بچانے اور اسے اپنے منطقی انجام تک پہنچانے کے لیے سنگِ میل ثابت ہوا۔

انہوں نے مزید کہا کہ مسلم کانفرنس کی موجودگی میں پاکستان مخالف ایجنڈے کی تکمیل ناممکن ہے۔ عوام نے باغ جلسہ میں شریک ہو کر یہ پیغام دیاکہ ریاستی عوام تحریکِ آزادی کشمیر کو اپنے خونِ جگر سے سینچنے کے لیے تیار ہیں۔محترمہ مہرالنساء نے کہا کہ راولا کوٹ اور باغ میں منعقدہ کامیاب جلسے اس بات کا ثبوت ہیں کہ کشمیری عوام اور پاک فوج ایک دوسرے کے شانہ بشانہ کھڑے ہیں۔

پاک فوج نے ہر مشکل گھڑی میں کشمیری عوام کی رہنمائی اور حفاظت کا حق ادا کیا ہے۔انہوں نے فیلڈ مارشل جنرل سید عاصم منیر کو زبردست الفاظ میں خراجِ تحسین پیش کرتے ہوئے کہا کہ ان کی قیادت میں پاک فوج نے نہ صرف دشمن کی سازشوں کو ناکام بنایا بلکہ عوامی فلاح و بہبود کے اقدامات کے ذریعے ریاستی عوام کا دل بھی جیتا ہے۔ ان کا وژن اور کردار پاکستان اور کشمیر دونوں کے لیے امید کی کرن ہے۔سیکرٹری جنرل مسلم کانفرنس نے کہا کہ ہر شہری نے تحریکِ آزادی کو کمزور ہونے سے بچایا اور دشمن کے پروپیگنڈے کو ناکام بنایا۔ انہوں نے کہا کہ کشمیری عوام اپنے اتحاد و اتفاق سے یہ پیغام دیا ہے کہ آزادی کشمیر کے مقدس مشن کو پایہ تکمیل تک پہنچانے کے لیے کسی قربانی سے دریغ نہیں کیا جائے گا۔