کراچی میں ٹریفک قوانین کی خلاف ورزیوں پر یکم اکتوبر سے ای چالان سسٹم کا آغاز ہوجائے گا

جدید الیکٹرانک سسٹم کے نفاذ کے بعد بلا تفریق کارروائیاں ممکن ہوں گی، جس سے مجموعی طور پر ٹریفک نظام میں بہتری آئے گی،ڈی آئی جی ٹریفک

منگل 23 ستمبر 2025 17:17

کراچی(اُردو پوائنٹ اخبارتازہ ترین - این این آئی۔ 23 ستمبر2025ء)گاڑی اور موٹر سائیکل مالکان ہوشیار ہوجائیں ، شہرقائد میں الیکٹرک چالاننگ (ای چالان)سسٹم شروع ہونے کی تاریخ قریب آگئی۔تفصیلات کے مطابق کراچی میں ٹریفک قوانین کی خلاف ورزیوں پر یکم اکتوبر سے ای چالان سسٹم کا آغاز کیا جارہا ہے، جس کے تحت چالان ٹریفک پولیس اہلکار کے بجائے جدید خودکار نظام کے ذریعے کیے جائیں گے۔

(جاری ہے)

ٹریفک پولیس کی جانب سے شہر کی اہم شاہراہوں پر آگاہی مہم جاری ہے تاکہ شہریوں کو نئے نظام سے متعلق مکمل معلومات فراہم کی جاسکیں۔شہریوں نے ای چالان سسٹم کو خوش آئند قرار دیتے ہوئے کہا ہے کہ اس اقدام سے رشوت ستانی اور امتیازی رویے کا خاتمہ ہوگا۔ڈی آئی جی ٹریفک پیر محمد شاہ نے بتایا کہ کئی ماہ سے ذرائع ابلاغ اور سوشل میڈیا کے ذریعے شہریوں کو آگاہی دی جارہی ہے۔انہوں نے کہا کہ مقصد صرف چالان کرنا نہیں بلکہ شہریوں کو ٹریفک قوانین پر عملدرآمد کا پابند بنانا ہے۔پیر محمد شاہ نے مزید کہا کہ جدید الیکٹرانک سسٹم کے نفاذ کے بعد بلا تفریق کارروائیاں ممکن ہوں گی، جس سے مجموعی طور پر ٹریفک نظام میں بہتری آئے گی۔