صوبائی وزیر صحت خواجہ سلمان رفیق نے پنجاب کی عوام کو نواز شریف کارڈیالوجی سنٹر مری میں سرجریز کے آغاز کی خوشخبری سنا دی

جمعرات 25 ستمبر 2025 20:57

لاہور (اُردو پوائنٹ اخبارتازہ ترین - اے پی پی۔ 25 ستمبر2025ء) صوبائی وزیر صحت خواجہ سلمان رفیق نے پنجاب کی عوام کو نواز شریف کارڈیالوجی سنٹر مری میں سرجریز کے آغاز کی خوشخبری سنا دی۔اس حوالے سے محکمہ سپیشلائزڈ ہیلتھ کیئر اینڈ میڈیکل ایجوکیشن میں اہم اجلاس منعقدہوا۔اجلاس کی صدارت صوبائی وزیر صحت خواجہ سلمان رفیق نے کی۔صوبائی وزیر خواجہ سلمان رفیق نے اس کارڈیک پراجیکٹ پر جاری پیش رفت کا تفصیلی جائزہ لیا۔

اجلاس میں سیکرٹری صحت پنجاب عظمت محمود خان نے شرکت کی۔اجلاس میں سپیشل سیکرٹری آپریشنز طارق محمود رحمانی، ایڈیشنل سیکرٹری انور بریار، ایڈیشنل سیکرٹری اشفاق الرحمن، ایڈیشنل سیکرٹری امیر محمد، ڈائریکٹر بجٹ اینڈ اکائونٹس حماد الرب و دیگر افسران نے شرکت کی۔

(جاری ہے)

ویڈیو لنک کے ذریعے چیئرمین وزیر اعلی پنجاب ایڈوائزری کمیٹی برائے امراض قلب ڈاکٹر فرقد عالمگیر، ایم ایس سید محمد حسین ساملی ہسپتال اینڈ نواز شریف کارڈیالوجی سنٹر ڈاکٹر قیصر محمود عباسی، ایگزیکٹو ڈائریکٹر راولپنڈی انسٹی ٹیوٹ آف کارڈیالوجی پروفیسر مسفراح، سی اینڈ ڈبلیو کے افسران و دیگر متعلقہ افسران نے شرکت کی۔

صوبائی وزیر صحت خواجہ سلمان رفیق نے کہاکہ وزیر اعلی پنجاب مریم نواز شریف عوام کی دہلیز پر بہترین اور جدید کارڈیک سہولیات فراہم کرنا چاہتی ہیں، اگلے ہفتے سے نواز شریف کارڈیالوجی سنٹر مری میں سرجریز کا آغاز کر دیا جائے گا، ڈیڑھ سال کے قلیل عرصہ کے دوران عوام تک بہترین کارڈیک سہولیات کی فراہمی کا کریڈٹ وزیر اعلی پنجاب اور حکومت پنجاب کو جاتا ہے۔

خواجہ سلمان رفیق نے کہاکہ مری و گردونواح کی عوام کو کارڈیک کی جدید سہولیات فراہم کرنے جا رہے ہیں۔اجلاس کے دوران اس ادارے کیلئے طبی سامان و ایچ آر کی تازہ صورتحال کا جائزہ لیا گیا ہے۔وزیرصحت پنجاب نے کہا کہ سید محمد حسین ساملی ہسپتال اینڈ نواز شریف کارڈیالوجی سنٹر مری و گردونواح کیلئے ایک بہترین علاج گاہ ثابت ہو گا،حکومت پنجاب کارڈیک کے تمام پراجیکٹس کیلئے تاریخ میں پہلی بار کروڑوں روپوں کی جدید مشینری خرید رہی ہے۔