سٹی ٹریفک پولیس پشاور کے زیر اہتمام ٹریفک قوانین سے متعلق آگاہی سیمینار

منگل 23 ستمبر 2025 17:55

پشاور (اُردو پوائنٹ اخبارتازہ ترین - اے پی پی۔ 23 ستمبر2025ء) سٹی ٹریفک پولیس پشاور کے زیر اہتمام رومی میڈیکل انسٹی ٹیوٹ میں ٹریفک قوانین سے متعلق آگاہی سیمینار کا انعقاد کیا گیا۔ تر جمان سٹی ٹریفک پولیس پشاور کے مطابق سیمینار میں ایس پی ہیڈکوارٹرز ارباب شفیع اللہ جان اور سٹی ٹریفک پولیس پشاور کی ایجوکیشن ٹیم نے طلبا کو ٹریفک قوانین سے متعلق آگاہی فراہم کی۔

سیمینار میں اساتذہ،طلبا اور دیگر نے کثیر تعداد میں شرکت کی۔ ایس پی ہیڈکوارٹرز اور ٹیم نے طلبہ کو روڈ سیفٹی، زیبرا کراسنگ اور سیٹ بیلٹ کے استعمال ، فوائد سمیت ڈرائیونگ کے اصول اور احتیاطی تدابیر بارے آگاہ کیا۔ ایس پی ہیڈکوارٹرز نے طلبہ کو ٹریفک قوانین اور روڈ سیفٹی سے متعلق لیکچر دیتے ہوئے کہا کہ دوران سفر سیٹ بیلٹ کے استعمال سے ٹریفک حادثات اور جانی نقصان سے بچا جا سکتا ہے۔

(جاری ہے)

انہوں نے کہا کہ سٹی ٹریفک پولیس مختلف اوقات میں مختلف اداروں میں جا کر طلبہ کو ٹریفک قوانین سے متعلق آگاہی فراہم کرتی ہے تاکہ ٹریفک حادثات میں کمی واقع ہو اور شہریوں کی زندگیوں کو محفوظ بنایا جا سکے۔ اس موقع پر چیف ٹریفک آفیسر ہارون رشید خان نے کہا ہے کہ ہمیشہ سیٹ بیلٹ باندھ کر لائن ڈسپلن اور دوسری گاڑیوں کا خیال رکھتے ہوئے گاڑی چلائیں اور دوران ڈرائیونگ موبائل فون کے استعمال سے گریز کریں۔ انہوں نے کہا کہ ٹریفک قوانین پر عملدرآمد سے ہی حادثات سے بچا جاسکتا ہے۔ انہوں نے کہا کہ منظم ٹریفک کسی بھی مہذب معاشرے کی عکاس ہوتی ہے، ٹریفک قوانین کی پاسداری حادثات پر قابو پانے کی ضامن ہے ۔