پاکستان اور چین سائنسی تعاون کے نئے دور میں داخل ہو رہے ہیں، احسن اقبال

سی پیک کا دوسرا مرحلہ جینومکس اور بایو ٹیکنالوجی پر مشتمل ہے، وفاقی وزیر کی گفتگو

جمعرات 25 ستمبر 2025 14:46

پاکستان اور چین سائنسی تعاون کے نئے دور میں داخل ہو رہے ہیں، احسن اقبال

گوانگژو(اُردو پوائنٹ اخبارتازہ ترین - این این آئی۔ 25 ستمبر2025ء) وفاقی وزیر احسن اقبال نے کہا ہے کہ پاکستان اور چین سائنسی تعاون کے ایک نئے دور میں داخل ہو رہے ہیں، سی پیک کا دوسرا مرحلہ جینومکس اور بایو ٹیکنالوجی پر مشتمل ہے۔ گوادر پرو کے مطابق بیجنگ جینومکس انسٹیٹیوٹ نے پاکستان کے ماہرین کیلئے جینومکس اور بایو ٹیکنالوجی کے شعبوں میں 500 تربیتی اسکالرشپس کا اعلان کر دیا ہے جو چین-پاکستان اقتصادی راہداری(سی پیک)کے تحت تعاون کو انفراسٹرکچر سے بڑھ کر صحت، غذائی تحفظ اور جدید سائنسی تحقیق تک وسعت دینے کی ایک اہم پیش رفت ہے۔

گوادر پرو کے مطابق وزارت منصوبہ بندی، ترقی و خصوصی اقدامات کی جانب سے جاری کردہ اعلامیے کے مطابق وفاقی وزیر احسن اقبال نے گوانگژو میں بی جی آئی ہیڈکوارٹر کے دورے کے دوران اس اقدام کو پاکستان کی ترقی کیلئے سنگِ میل قرار دیتے ہوئے کہا کہ سی پیک کا دوسرا مرحلہ، جو جینومکس اور بایو ٹیکنالوجی پر مشتمل ہے، صحت، خوراک کے تحفظ اور اختراعات کے میدان میں نئی راہیں کھولے گا۔

(جاری ہے)

وفاقی وزیر کا کہنا تھا کہ پاکستان اور چین اب انفراسٹرکچر سے آگے بڑھ کر سائنسی تعاون کے ایک نئے دور میں داخل ہو رہے ہیں۔ گوادر پرو کے مطابق وفاقی وزیر نے اس بات پر زور دیا کہ جینومکس کا کردار مستقبل میں صحت عامہ، خوراک کی خودکفالت اور مجموعی ترقی کے لیے کلیدی حیثیت اختیار کر رہا ہے۔ انہوں نے چینی اداروں کا شکریہ ادا کرتے ہوئے کہا کہ پاکستانی ماہرین کو بین الاقوامی سطح پر تربیت کے مواقع فراہم کرنا خوش آئند اقدام ہے۔

گوادر پرو کے مطابق واضح رہے کہ وفاقی وزیر احسن اقبال ان دنوں چین کے سرکاری دورے پر ہیں جہاں وہ سی پیک پر 14ویں مشترکہ تعاون کمیٹی (JCC) کے اجلاس کی مشترکہ صدارت کر رہے ہیں۔ ان کا دورہ گوانگژو، ژوژو اور چانگشا کے مختلف شہروں میں سائنسی، ٹیکنالوجی اور سماجی و اقتصادی ترقی کے شعبوں میں باہمی تعاون کو مزید فروغ دینے پر مرکوز ہے۔