Live Updates

وزیراعظم سے بل گیٹس کی ملاقات؛ صحت اور معیشت کی ڈیجیٹلائزیشن کیلئے تعاون پر اتفاق

شہباز شریف نے پاکستان میں پولیو کے تدارک، قوت مدافعت اور غذائی معیار میں اضافہ اور معاشی شمولیت کے لیے حکومتی اقدامات میں بل گیٹس فاؤنڈیشن کے تعاون کا شکریہ ادا کیا

ساجد علی جمعرات 25 ستمبر 2025 14:02

وزیراعظم سے بل گیٹس کی ملاقات؛ صحت اور معیشت کی ڈیجیٹلائزیشن کیلئے ..

نیویارک ( اُردو پوائنٹ اخبارتازہ ترین۔ 25 ستمبر 2025ء ) وزیراعظم شہبازشریف اور بل گیٹس کی ملاقات میں صحت اور معیشت کی ڈیجیٹلائزیشن کیلئے تعاون پر اتفاق کیا گیا۔ وزیراعظم آفس سے جاری بیان کے مطابق وزیراعظم شہباز شریف سے بل گیٹس فاؤنڈیشن کے بانی بل گیٹس نے اقوام متحدہ جنرل اسمبلی 80 اجلاس کی سائیڈ لائن پر خوشگوار ماحول میں ملاقات کی، وزیراعظم نے بل گیٹس فاؤنڈیشن کی طرف سے 2022ء کے سیلاب کے پیش نظر قابل ذکر امدادی کارروائیوں کو یاد کرتے ہوئے حالیہ 2025ء کے سیلاب کے بعد دی جانے والی امداد کو بھی قابل تحسین قرار دیا۔

بتایا گیا ہے کہ وزیراعظم نے پاکستان میں پولیو کے تدارک، قوت مدافعت اور غذائی معیار میں اضافہ اور معاشی شمولیت کے لیے حکومتی اقدامات میں بل گیٹس فاؤنڈیشن کے تعاون کا شکریہ ادا کیا، اس کے علاوہ وزیراعظم نے پولیو کے مکمل تدارک کے حصول میں بل گیٹس فاؤنڈیشن کے مسلسل تعاون کی اہمیت پر خصوصی زور دیا۔

(جاری ہے)

معلوم ہوا ہے کہ ملاقات میں وزیراعظم نے حکومت کی طرف سے کی جانے والی جامع معاشی ریفارمز، ڈیجیٹلائزیشن میں بل گیٹس فاؤنڈیشن کی عملی اور مثبت تعاون کی خصوصی تعریف کی، وزیراعظم شہباز شریف اور بل گیٹس نے پاکستان کی معاشی و معاشرتی ترقی بالخصوص صحت، غذائی معیار و مدافعت میں اضافہ، معاشی شمولیت اور معیشت کی ڈیجیٹلائزیشن جیسے اقدامات میں مشترکہ تعاون کو جاری رکھنے کے عزم کا اعادہ کیا۔