Live Updates

چیئرمین پی پی پی بلاول بھٹو زرداری کا ضمنی بلدیاتی الیکشن میں اپنی جماعت کی شاندار کامیابی پر عوام سے اظہار تشکر

جمعرات 25 ستمبر 2025 13:46

اسلام آباد (اُردو پوائنٹ اخبارتازہ ترین - اے پی پی۔ 25 ستمبر2025ء) پیپلز پارٹی کے چیئرمین بلاول بھٹو زرداری نے ضمنی بلدیاتی الیکشن میں اپنی جماعت کی شاندار کامیابی پر عوام سے تشکر کا اظہار کرتے ہوئے نومنتخب بلدیاتی نمائندوں کو مبارکباد اور جیالوں کو اس فتح کو یقینی بنانے کے لیے دن رات محنت پر خراجِ تحسین پیش کیا ہے۔ میڈیا سیل بلاول ہاوَس سے جاری بیان کے مطابق چیئرمین پی پی پی نے سندھ میں ضمنی بلدیاتی انتخابات کے نتائج پر اپنے ردعمل میں کہا کہ کراچی سے کشمور تک عوام نے ایک بار پھر ووٹ کے ذریعے پیپلز پارٹی پر اپنے غیر متزلزل اعتماد کا اظہار کیا ، یہ کامیابی قائدِ عوام شہید ذوالفقار علی اور شہید محترمہ بینظیر بھٹو کی جماعت سے عوام کے گہرے رشتے کا ثبوت ہے۔

بلاول بھٹو زرداری کا کہنا تھا کہ ضمنی انتخابات میں عوام کی بھرپور حمایت سے پیپلز پارٹی کا عزم اور بھی مضبوط ہوا ہے اور ہم مزید جوش و خلوص کے ساتھ عوام کی خدمت کریں گے۔

(جاری ہے)

انہوں نے کہا کہ پیپلز پارٹی کو دیا گیا ہر ووٹ دراصل جمہوریت، عام آدمی کے حقوق کے تحفظ اور ایک ترقی پسند و خوشحال پاکستان کے وژن کے حق میں ڈالا گیا ہے۔ انہوں نے اس عزم کا اعادہ کیا کہ پی پی پی بلدیاتی اداروں کے استحکام، ہر محلے، ہر گاؤں اور ہر شہر کی ترقی کے لیے جدوجہد جاری رکھے گی۔

چیئرمین بلاول بھٹو زرداری کا کہنا تھا کہ سندھ میں مستحکم بلدیاتی نظام نچلی سطح تک وسائل و اختیارات کی منصفانہ تقسیم کا مضبوط میکانزم اور پائیدار ترقی کی ضمانت ہے۔ انہوں نے کہا کہ سندھ کے بلدیاتی ادارے اور پیپلز پارٹی کا بلدیاتی نظام کے متعلق ویژن دیگر جماعتوں اور اُن کی حکومتوں کے لیے قابل تقلید مثال ہے۔ انہوں نے نشاندہی کی کہ ملک کے سب سے بڑی آبادی والے صوبے پنجاب کے عوام طویل عرصے سے بلدیاتی نظام اور اس کے ممکنہ ثمرات سے محروم ہیں۔

انہوں نے کہا کہ آج اگر پنجاب میں منتخب بلدیاتی ادارے فعال ہوتے تو سیلاب متاثرین کی بلا امتیاز امداد میں رکاوٹیں حائل نہ ہوتیں۔ چیئرمین پی پی پی نے تمام جماعتوں اور شہریوں سے اپیل کرتے ہوئے زور دیا کہ آئیے ہم سب مِل کر ایسا پاکستان تعمیر کریں جہاں جمہوریت پھلے پھولے اور ہر شہری عزت و وقار کے ساتھ زندگی گزارے۔\932