Live Updates

بھارتی کپتان سوریا کمار یادیو کو مستقبل میں سیاسی بیان نہ دینے کی ہدایت

پاکستان کے خلاف گروپ اسٹیج کے میچ کے بعد سوریا کمار یادیو نے سیاسی جملے بولے تھے

جمعرات 25 ستمبر 2025 21:00

دبئی (اُردو پوائنٹ اخبارتازہ ترین - این این آئی۔ 25 ستمبر2025ء)انٹرنیشنل کرکٹ کونسل (آئی سی سی) نے بھارتی کرکٹ ٹیم کے کپتان سوریا کمار یادیو کی سرزنش کردی۔پاکستان نے سوریا کمار یادیو کے بیان کے خلاف آئی سی سی سے شکایت کی تھی، سوریا کمار یادیو کے معاملے کی آئی سی سی حکام کے سامنے سماعت ہوئی۔پاکستان کے خلاف گروپ اسٹیج کے میچ کے بعد سوریا کمار یادیو نے سیاسی جملے بولے تھے، پاکستان نے سوریا کمار یادیو کے خلاف آئی سی سی کو باقاعدہ شکایت کی تھی۔

ذرائع کے مطابق آئی سی سی نے بھارتی کپتان سوریا کمار یادیو کو مستقبل میں سیاسی بیان نہ دینے کی ہدایت کرتے ہوئے بھارتی کپتان کو مستقبل میں محتاط رہنے کی ہدایت کی ہے۔اس سے قبل میچ ریفری رچی رچرڈسن نے پاکستان کی شکایت ملنے پر بھارتی ٹیم مینجمنٹ کو ای میل کرتے ہوئے کہا تھا کہ لگتا ہے سوریا کمار نے کھیل کی ساکھ کو نقصان پہنچایا۔

(جاری ہے)

میچ ریفری کی جانب سے کہا گیا تھا کہ پاکستان کے جمع کرائے گئے شواہد کے جائزے کے بعد سوریا کمار کے خلاف کارروائی ہونی چاہیے، سوریا کمار یادیو نے کھیل کے مفاد کے خلاف غیر مناسب ریمارکس دیے۔

پاکستان نے آئی سی سی کو تفصیلی خط لکھا تھا کہ سوریا کمار نے 14 ستمبر کو میچ کے اختتام پر سیاست کو کھیل میں ملوث کیا اور کھیل کی شہرت کو نقصان پہنچایا، آئی سی سی کے ضابطہ اخلاق کی خلاف ورزی کی، سوریا کمار کا بیان براہ راست پاکستان کے خلاف تھا۔ذرائع کے مطابق پاکستان کرکٹ بورڈ نے آئی سی سی کو لکھے خط میں کہا تھا کہ ایشیا کپ کے میچز پر آئی سی سی کے کوڈ آف کنڈکٹ کی تمام دفعات لاگو ہوتی ہیں، اگر سوریا کمار یادیو کے خلاف کارروائی نہ کی گئی تو کرکٹ کا میدان سیاسی اکھاڑہ بن جائے گا، بھارتی کپتان کے خلاف سخت کارروائی کی جائے۔