اسرائیل غزہ میں نسل کشی کر رہا ہے اور بھارتی حکومت خاموش ہے،سونیا گاندھی

وزیرِاعظم مودی کو شخصی معاملات سے اونچا اٹھ کر ملکی معاملات پر دھیان دینا چاہیے،انٹرویو

جمعہ 26 ستمبر 2025 14:30

نئی دہلی (اُردو پوائنٹ اخبارتازہ ترین - این این آئی۔ 26 ستمبر2025ء)بھارتی اپوزیشن رہنما سونیا گاندھی نے کہا کہ اسرائیل غزہ میں نسل کشی کر رہا ہے اور یہاں بھارتی حکومت خاموش ہے۔بھارتی میڈیا کے مطابق بھارتی اپوزیشن جماعت کانگریس کی رہنما سونیا گاندھی نے غزہ کے معاملے پر مودی سرکار کی خاموشی کو سمجھ سے بالا قرار دیا ہے۔سونیا گاندھی نے بھارت کے معروف روزنامے دی ہندو میں اس حوالے سے ایک خصوصی مضمون لکھا جس کا موضوع بھارت کی بند آواز ہے، جس میں انہوں نے بھارتی حکمران جماعت بھارتیہ جنتا پارٹی کی قیادت کو تنقید کا نشانہ بنایا خصوصا غزہ کے معاملے پر اسرائیل کی جانب سے انسانی حقوق کی خلاف ورزیوں اور عالمی قوانین کی پامالی پر مودی حکومت کی خاموشی پر سوال اٹھایا ہے۔

سونیا گاندھی نے کہا کہ وزیرِاعظم مودی کو شخصی معاملات سے اونچا اٹھ کر ملکی معاملات پر دھیان دینا چاہیے، اس قسم کی سفارتکاری ناقابل برداشت ہے۔

(جاری ہے)

سونیا گاندھی نے بتایا کہ غزہ میں ہزاروں فلسطینی شہید ہوچکے ہیں، جن میں 17 ہزار سے زائد معصوم بچے شامل ہیں، یہ سب نسل کشی کے سوا اور کچھ نہیں ہے۔بھارتی اپوزیشن لیڈر نے کہا کہ اسرائیل غزہ سے لوگوں کو دھکیل رہا ہے، وہاں قحط کی صورتحال پیدا کی ہوئی ہے، یہاں تک کہ فلسطینیوں کو امداد لیتے ہوئے بھی نشانہ بنایا جارہا ہے۔

انہوں نے کہا کینیڈا، برطانیہ، فرانس پرتگال اور آسٹریلیا فلسطینی ریاست کو تسلیم کرچکے ہیں، اور ہم جو 1988 سے فلسطینی ریاست کو تسلیم کیے ہوئے ہیں، ہم اقوام متحدہ اور غیر جانبدار تحریک میں ان کے لیے آواز اٹھاتے تھے، امن کے لیے مزاکرات کی حمایت کرتے تھے، جب بھارت فلسطین کو آگے آکر حمایت کرتا تھا۔