وزیر اعلیٰ مریم نواز کی زیر صدارت اجلاس، پنجاب کے پبلک اورپرائیویٹ میڈیکل اینڈڈینٹل کالجز کیلئے ایڈمیشن پالیسی کی منظوری

جمعہ 26 ستمبر 2025 21:40

لاہور (اُردو پوائنٹ اخبارتازہ ترین - اے پی پی۔ 26 ستمبر2025ء) وزیر اعلیٰ پنجاب مریم نواز کی زیر صدارت خصوصی اجلاس منعقد ہوا،جس میں محکمہ صحت سے متعلق اہم فیصلے کیے گئے۔اجلاس میں پنجاب کے پبلک اورپرائیویٹ میڈیکل اینڈڈینٹل کالجز کیلئے ایڈمیشن پالیسی کی منظوری دی گئی۔اجلاس میں سرکاری میڈیکل کالجز میں داخلے کیلئے ایم ڈی کیٹ ٹیسٹ پاس کرنا ضروری قرار دیاگیا۔

اوورسیز پاکستانیزکے بچوں کیلئے 20ہزار ڈالر فیس مقررکی گئی۔اجلاس میں پرائیویٹ میڈیکل کالج میں داخلے کیلئے یونیورسٹی آف ہیلتھ سائنسز میں فیس جمع کروانے کا فیصلہ کیاگیا۔پرائیویٹ میڈیکل اینڈ ڈینٹل کالجزکی حتمی لسٹ آنے کے بعد متعلقہ کالج کو جمع شدہ ایک تہائی فیس ٹرانسفر کرے گی۔ پرائیویٹ میڈیکل اینڈ ڈینٹل کالجز میں داخلے کے خواہشمند طلبا حتمی میرٹ لسٹ آنے پر متعلقہ کالج میں ہی فیس جمع کرائیں گے۔

(جاری ہے)

اجلاس میں پرائیویٹ ہسپتالوں میں پوسٹ گریجویٹ ٹریننگ کے بعد لازمی سروس لینے کی باہم تجویز پر اتفاق کیا گیا۔پرائیویٹ میڈیکل کالجز میں سپیشلسٹ کی مانگ کے مطابق ٹرینی ڈاکٹر کومتعلقہ شعبے میں سپیشلائزڈکیلئے بھیجا جائے گا۔وزیراعلیٰ نے ساہیوال میں پہلی کامیاب انجیو پلاسٹی پر اظہار مسرت کرتے ہوئے کارڈیک مرکزمیں سرجری کے آغازکو خوش آئند قراردیاہے۔

انہوں نے میو ہسپتال کو ابلیشن سینٹر میں مریضوں کے علا ج کیلئے فول پروف اورشفاف طریقے کار وضع کرنے کی ہدایت کرتے ہوئے کینسر کے مریضوں کو ہر صورت ریلیف دینے کی ہدایت کی۔ اجلاس میں پنجاب میں نئے میڈیکل کالج کی الگ بلڈنگ بنانے کے بجائے سرکاری یونیورسٹیوں میں ہی میڈیکل بلاک بنانے کی تجویز پر اتفاق کیاگیا ۔وزیراعلیٰ نے پنجاب کے مختلف اداروں کے بورڈ آف مینجمنٹ کی منظوری بھی دے دی۔ انہوں نے کہاکہ پنجاب کے ہر ہسپتال میں غریب مریض کو روپیہ خرچ کیے بغیر مفت علاج کی سہولت ملنی چاہیے۔میں چاہتی ہوں کہ کینسر کے ہر مریض کا علاج ممکن بنایا جائے۔وزیراعلیٰ نے نواز شریف میڈیکل سٹی کے جلد قیام کیلئے بھی ضروری اقدامات کرنے کی ہدایت کردی۔