غزہ: اسرائیلی حملوں میں شدت سے کئی ہسپتال بند، ڈبلیو ایچ او

اسلام آباد (اُردو پوائنٹ ۔ UN اردو۔ 26 ستمبر 2025ء) غزہ شہر میں اسرائیل کی عسکری کارروائی شدت اختیار کرنے سے طبی عملے پر دباؤ میں اضافہ ہو گیا ہے۔ عالمی ادارہ صحت (ڈبلیو ایچ او) نے بتایا ہے کہ رواں ماہ ہی علاقے میں مزید چار بڑے طبی مراکز بند ہو گئے ہیں جس کے بعد پورے غزہ میں فعال ہسپتالوں کی تعداد صرف 14 رہ گئی ہے۔

'ڈبلیو ایچ او' کے ترجمان طارق جسارویچ نے بتایا ہے کہ اسرائیلی فوج کی جانب سے غزہ شہر کی آبادی کو متواتر انخلا کے احکامات دیے جا رہے ہیں جن سے طبی مراکز بھی متاثر ہوئے ہیں۔

حالیہ دنوں بند ہونے والے طبی مراکز میں الرنتیسی چلڈرن ہسپتال، اوپتھلمک ہسپتال، سینٹ جان آئی ہسپتال اور حماد ہسپتال برائے بحالی و مصنوعی اعضا شامل ہیں۔

(جاری ہے)

ترجمان کا کہنا ہے کہ جنوبی علاقے میں واقع ہسپتالوں پر بوجھ میں کئی گنا اضافہ ہو گیا ہے۔ اس وقت غزہ شہر میں آٹھ جبکہ دیرالبلح اور خان یونس میں تین تین ہسپتال واقع ہیں اور ان میں کوئی بھی پوری طرح فعال نہیں ہے۔ غزہ شہر میں اسرائیلی حملوں سے بڑی تعداد میں ہلاک و زخمی ہونے والے لوگوں کو ہسپتالوں میں لایا جا رہا ہے جہاں انہیں علاج معالجہ مہیا کرنے کے لیے کئی ضروریات سہولیات دستیاب نہیں ہیں۔

'ڈبلیو ایچ او' کے مطابق، حماد ہسپتال غزہ میں جسمانی معذور افراد کی بحالی کے تین اہم مراکز میں سے ایک ہے۔ یہ ہسپتال 250 مریضوں کو بحالی کی خدمات فراہم کر رہا تھا۔ علاوہ ازیں، یہاں شمالی غزہ میں امداد کے حصول کے دوران زخمی ہونے والے افراد کو بھی طبی مدد مہیا کی جا رہی تھی۔

ہسپتالوں پر تباہ کن حملے

الرنتیسی ہسپتال کو 16 ستمبر کو ایک براہ راست حملے میں شدید نقصان پہنچا جب وہاں 80 مریض موجود تھے۔

'ڈبلیو ایچ او' کے مطابق حملے کے بعد نصف مریض ہسپتال چھوڑ گئے جبکہ تقریباً 40 اب بھی وہاں موجود ہیں جن میں انتہائی نگہداشت کے یونٹ میں زیرعلاج چار بچے اور آٹھ نومولود بھی شامل ہیں۔

'ڈبلیو ایچ او' نے خون کے یونٹ، بیگ اور ٹرانسفیوژن سامان کی شدید قلت کی جانب توجہ دلاتے ہوئے خبردار کیا ہے کہ اگر فوری طور پر اس کی ترسیل بحال نہ کی گئی تو یہ خدمات چند روز میں بند ہو سکتی ہیں۔

طبی سامان کی شدید قلت

طارق جسارویچ نے کہا ہے کہ غزہ کے لوگ بار بار نقل مکانی پر مجبور ہیں۔

ترجمان نے ہزاروں شدید بیمار مریضوں کے فوری انخلا کی اپیل کو دہراتے ہوئے کہا ہے کہ انہیں غزہ سے باہر خصوصی نگہداشت کی ضرورت ہے۔

اس وقت 15 ہزار سے زیادہ لوگ طبی وجوہات کی بنا پر انخلا کے منتظر ہیں جبکہ انہیں علاقے سے باہر بھجوانے کا عمل انتہائی سست رفتار ہے۔

انہوں نے جنگ بندی اور انسانی امداد تک بلارکاوٹ رسائی فراہم کرنے کی اپیل کرتے ہوئے کہا ہے کہ باقیماندہ نظام صحت کو طبی سازوسامان، ہنگامی طبی ٹیموں اور دیگر ضروری وسائل کے ذریعے سہارا دینے کی ضرورت ہے۔